realme នឹងប្រកាសចេញលក់ទូរស័ព្ទឆ្លាតជំនាន់ថ្មីរបស់ម៉ូដែល realme 8 5G និង 8 Pro 5G នៅទីផ្សារប្រទេសថៃនៅថ្ងៃទី 21 ខែមេសា សប្តាហ៍ក្រោយនេះ។ ហើយក្រុមហ៊ុនក៏នឹងនាំយកម៉ូដែល realme 8 5G ទៅប្រកាសចេញលក់នៅទីផ្សារប្រទេសឥណ្ឌានៅថ្ងៃបន្ទាប់ផងដែរគឺនៅថ្ងៃទី 22 ខែមេសា, 2021។ ជាការពិតណាស់ទូរស័ព្ទ 5G ជំនាន់ថ្មីរបស់ realme មួយនេះត្រូវបានគេប្រទះឃើញលើផ្ទាំង Poster នៅលើគេហទំព័រ Flipkart របស់ឥណ្ឌារួចហើយដែរ។
realme គឺជាក្រុមហ៊ុនមួយដែលបានផ្តល់នូវជម្រើសកត្តាតម្លៃសម្រាប់ទូរស័ព្ទ 5G ផ្សេងៗគ្នាតម្រូវតាមទីផ្សារនៃអ្នកប្រើប្រាស់ក្នុងប្រទេសឥណ្ឌា។ ក្រុមហ៊ុនផលិតស្មាតហ្វូនវ័យក្មេងដែលមានទីផ្សាររីកចម្រើនឥតឈប់មួយនេះបានប្រកាសចេញលក់ទូរស័ព្ទ Flagship 5G ដំបូងម៉ូដែល realme X50 Pro 5G កាលពីឆ្នាំមុន ហើយថ្មីៗនេះ realme ក៏បានប្រកាសចេញលក់ទូរស័ព្ទ 5G មួយចំនួនបន្ថែមទៀតដែលមានដូចជា realme X7 5G , X7 Pro 5G និង Narzo 30 5G នៅទីផ្សារឥណ្ឌាបន្ថែមទៀត។ ហើយពេលនេះ realme ក៏ត្រៀមនាំយកទូរស័ព្ទ 5G ដែលប្រើបន្ទះឈីប MediaTek Dimensity 700 ដំបូងរបស់ខ្លួនចូលទៅកាន់ប្រទេសមួយនេះផងដែរ។
កាលពីខែមិនាក្រុមហ៊ុន realme បានប្រកាសចេញទូរស័ព្ទឆ្លាតវៃស៊េរីថ្មីម៉ូដែល realme V13 5G ដែលជាទូរស័ព្ទដំបូងប្រើប្រាស់បន្ទះឈីប MediaTek Dimensity 700 ដែលទូរស័ព្ទស៊េរីថ្មីនេះត្រូវបានគេដឹងថានឹងនាំយកទៅប្រកាសចេញលក់ក្នុងទីផ្សារប្រទេសឥណ្ឌាក៏ដូចជាទីផ្សារផ្សេងៗទៀតរួមទាំងប្រទេសថៃផងក្រោមស្លាកឈ្មោះថ្មីថា realme 8 5G។
realme 8 5G ត្រូវបានគេដឹងថាបំពាក់នូវបន្ទះអេក្រង់ប្រភេទ IPS LCD កម្រិត Full-HD+ ទំហំ 6.5 អ៊ីញ និងមានកម្រិត refresh rate 90Hz។ realme 8 5G នឹងមានរ៉េមទំហំ 8GB LPDDR4x មានអង្គផ្ទុកទិន្នន័យទំហំ 256GB USF2.1 និងប្រតិបត្តិការណ៍ដោយ Android 11 ស្រោបដោយផ្ទៃកម្មវិធី realme UI2.0។ ចំនែកកាមេរ៉ាថតរូប និងវីដេអូខាងក្រោយវិញគឺមាន 3 គ្រាប់ ភ្ជាប់ប្រើសែនស័រផលិតរូបគោលទំហំ 48MP ជាមួយនឹងលែនជំនួយបន្ថែមពីរគ្រាប់គឺ Macro និង Depth Sensor ទំហំ 2.MP ដូចគ្នា។ សម្រាប់ថ្មវិញ realme 8 5G នឹងមានទំហំ 5,000mAh និងទ្រទ្រង់បច្ចេកវិទ្យាសាកថ្មកំលាំង 18W។ ទោះជាយ៉ាងណាក្រុមហ៊ុន realme ត្រូវបានគេដឹងថានឹងប្រកាសបញ្ជាក់បន្ថែមពីគុណសម្បត្តិរបស់ realme 8 5G នៅថ្ងៃទី 16 ខែមេសា ត្រូវនឹងថ្ងៃស្អែកនេះ៕