កំពូលស្មាតហ្វូន Sony Xperia 1 III នឹងបង្ហាញខ្លួននៅក្នុងទីផ្សារប្រទេសចិន ថ្ងៃទី 20 ខែឧសភាខាងមុខនេះហើយ

កាលពីម្សិលមិញនេះ ក្រុមហ៊ុន Sony បានបង្ហាញនូវវត្តមានរបស់ស្មាតហ្វូន Flagship ស៊េរីថ្មីរបស់ខ្លួនចំនួនពីរម៉ូដែល មានដូចជាម៉ូដែល Xperia 1 III និង 5 III។ បន្ទាប់ពីមួយថ្ងៃក្រោយមក ក្រុមហ៊ុនបច្ចេកវិទ្យាយក្សរបស់ជប៉ុនមួយនេះ ក៏បានធ្វើការបង្ហោះនៅលើ Weibo ដែលមានការបញ្ជាក់អំពីកាលបរិច្ឆេទនៃការបង្ហាញវត្តមានរបស់ស្មាតហ្វូននេះ នៅក្នុងទីផ្សារប្រទេសចិនថែមទៀតផង។

យោងតាមខ្លឺមសារនៃការបង្ហោះជាផ្លូវការណ៍នៅលើគណនី Weibo នេះ បានបង្ហាញថា ក្រុមហ៊ុន Sony គឺនឹងនាំយកនូវស្មាតហ្វូន Sony Xperia 1 III ទៅកាន់ទីផ្សារប្រទេសចិន នៅថ្ងៃទី 20 ខែឧសភាខាងមុខនេះហើយ។

ប៉ុន្តែក្រុមហ៊ុន Sony នៅមិនទាន់ទម្លាយអំពីកាលបរិច្ឆេទនៃការប្រការចេញលក់សម្រាប់ទីផ្សារសកលនោះទេ គឺគ្រាន់តែបានបង្ហាញខ្លួននៅក្នុងប្រទេសរុស្សីតែមួយប៉ុណ្ណោះ ជាមួយការចេញលក់ក្នុងតម្លៃ RUB 99,990($1,302)។ សូមជំរាបថា នៅពេលនេះ នៅលើវេបសាយ JD.com របស់ប្រទេសចិន ក៏មានការបង្ហាញពីការចុះឈ្មោះកក់ទិញមុនសម្រាប់ស្មាតហ្វូនជំនាន់ថ្មីនេះផងដែរ។ 

សម្រាប់តម្លៃរបស់ស្មាតហ្វូននេះ នៅក្នុងប្រទេសចិន គឺមិនទាន់មានការបញ្ជាក់ច្បាស់នោះទេ ក្រុមហ៊ុនអាចនឹងត្រូវទម្លាយនៅក្នុងសន្និសីទនេះ នៅថ្ងៃទី 20 ខែឧសភានោះតែម្តង។ ស្មាតហ្វូន Sony Xperia 1 III នេះ មានអេក្រង់ទំហំ 6.5-inch 4K OLED HDR FHD+ 120Hz display និងមានប្រើប្រាស់នូវបន្ទះឈីប Qualcomm Snapdragon 888 ជាមួយនឹងរ៉េមទំហំ 12GB ហើយនិងម៉េមូរីទំហំ 256GB ហើយនិងអាចបន្ថែមនូវម៉េមូរីបាន 1TB។ 

ស្មាតហ្វូន  Sony Xperia 1 III នេះ មានកាមេរ៉ាខាងក្រោយ 4 គ្រាប់ដែលមានទំហំ 12MP f/1.7 primary lens, 12MP f/2.2 ultra-wide ជាមួយនឹង 123-degree FOV, 12MP f/2.3-2.8 periscope lens និង 3D iToF sensor។ ស្មាតហ្វូន Sony Xperia 1 III មានកាមេរ៉ាខាងមុខទំហំ 8MP f/2.0 selfie ថាមពលថ្មទំហំ 4500mAh និងបច្ចេកវិទ្យាសាកថ្ម 30W Wired Charging ថែមទៀតផង។

ស្មាតហ្វូន Sony Xperia 1 III នេះ មានមុខងារជាច្រើនទៀតដូចជាប្រព័ន្ធស្កេនក្រយ៉ៅដៃនៅចំហៀង ប្រព័ន្ធ stereo speakers ជាមួយនឹង 360 Reality Audio, Hi-Res Audio, IP68 និង Android 11 OS ថែមទៀត។ ស្មាតហ្វូន Xperia 1 III នេះមានវិមាត្រ 165x71x8.2mm និងទម្ងន់ 187g។ ស្មាតហ្វូននេះមាន 3 ពណ៌ គឺពណ៌ស្វាយ ខ្មៅ និងប្រផេះ៕