យោងតាមការបញ្ជាក់ពីនាយកប្រតិបត្តិរបស់ក្រុមហ៊ុន ASML បានអោយដឹងថា ការប៉ុនប៉ងក្នុងការគ្រប់គ្រងទៅលើការនាំចេញទៅលើបន្ទះឈីបទៅកាន់ប្រទេសចិននោះ ត្រូវបានលោកជឿជាក់ថា នឹងមិនមានប្រសិទ្ធិភាពនោះទេ។ នាយកប្រតិបត្តិរូបនេះបាននិយាយថា នេះមិនត្រឹមតែបរាជ័យនោះទេ ប៉ុន្តែវាធ្វើអោយប៉ះពាល់ដល់សេដ្ឋកិច្ចរបស់សហរដ្ឋអាមេរិកថែមទៀតផង។
របាយការណ៍ចេញពី Bloomberg បានបញ្ជាក់ថា លោក Peter Wennink ដែលជានាយកប្រតិបត្តិរបស់ក្រុមហ៊ុន ASML Holding បានបង្ហាញនូវការជឿជាក់ថា ការព្យាយាមក្នុងការគ្រប់គ្រងទៅលើការនាំចេញទៅលើបន្ទះឈីបទៅក្នុងតំបន់នេះនឹងធ្វើអោយប៉ះពាល់ដល់សេដ្ឋកិច្ចរបស់សហរដ្ឋអាមេរិក។ ការផ្លាស់ប្តូរនេះ គឺចំពេលដែលមានភាពតានតឹងរវាងសហរដ្ឋអាមេរិក និងចិន ដែលធ្វើអោយមានការរឹតបន្តឹងទៅលើការលក់សមាសភាគជាច្រើនរបស់ក្រុមហ៊ុនបច្ចេកវិទ្យាហូឡង់នេះ ទៅកាន់ក្រុមហ៊ុនជាច្រើនរបស់ចិន។
នាយកប្រតិបត្តិជាន់ខ្ពស់របស់ក្រុមហ៊ុននេះ បាននិយាយថា ការគ្រប់គ្រងទៅលើការនាំចេញនេះ មិនមែនជាវិធីដែលត្រឹមត្រូវក្នុងការគ្រប់គ្រងទៅលើហានិភ័យនៃសេដ្ឋកិច្ចនះទេ។
នាយកប្រតិបត្តិនេះ បាននិយាយបន្តថា “អ្នកបិទប្រទេសចិនពីការចូលទៅកាន់បច្ចេកវិទ្យានោះ គឺនឹងធ្វើអោយអ្នកខាតបង់ទៅលើផ្នែកសេដ្ឋកិច្ច និងប្រាក់ចំណូលរបស់ខ្លួន។” លោក Wennink ជឿជាក់ថា រឿងបិទនេះ នឹងនាំអោយប្រទេសចិនបង្កើតនូវបន្ទះឈីបផ្ទាល់ខ្លួន និងបច្ចេកវិទ្យាផ្ទាល់ខ្លួននោះ ដោយសារតែកង្វះទៅលើបច្ចេកវិទ្យារបស់បរទេស ហើយក្រុមហ៊ុនជាច្រើនដែលមិនមែនជារបស់ចិន នឹងត្រូវបានរារាំងចេញពីទីផ្សារផ្គត់ផ្គង់បន្ទះឈីបធំបំផុតរបស់ពិភពលោក។
ការបិទបែបនេះ គឺនិងអាចបង្ករនូវគ្រោះមហន្តរាយដល់ក្រុមហ៊ុនជាច្រើនដែលមានមូលដ្ឋាននៅអាមេរិក ដែលធ្វើពាណិជ្ចកម្មជាមយយនឹងចិន។ នាយកប្រតិបត្តិនេះ បានបន្ថែមថា នៅក្នុងការបញ្ជប់ទៅលើទំនាក់ទំនងជាមួយនឹងចិននេះ អាចនឹងមានការខាតបង់ទឹកប្រាក់ពី 80 ពាន់លានដុល្លារទៅ 100 ពាន់លានដុល្លារអាមេរិក។ បន្ថែមពីនេះទៀតនោះ វាធ្វើអោយមានការប៉ះពាល់ដល់ការងារជាង 125,000 កន្លែងនៅក្នុងសហរដ្ឋអាមេរិកផងដែរ៕