រហូតមកដល់ពេលនេះ ក្រុមហ៊ុន Samsung បានកា្លយជាអ្នកនាំមុខទៅលើស្មាតហ្វូនដែលអាចបត់បានជាមួយនឹងស្មាតហ្វូនត្រកូល Galaxy Z series របស់ខ្លួនដដែល។ ថ្មីៗនេះ ក្រុមហ៊ុនបច្ចេកវិទ្យានេះ បានបញ្ចេញនូវស្មាតហ្វូនដែលអាចបត់បានចំនួនពីរប្រភេទរបស់ខ្លួន ហើយស្មាតហ្វូនទាំងពីរនេះគឺមានតែ Hinge មួយប៉ុណ្ណោះ។ ជាមួយនឹងរឿងនេះ គឺមានរបាយការណ៍ជាច្រើន និយាយអំពីស្មាតហ្វូន Galaxy ដែលអាចបត់បាន 3 តង់នេះ។ តាមការបញ្ជាក់របស់ប្រភពនេះ បានអោយដឹងថា ស្មាតហ្វូននេះស្ថិតនៅក្នុងការអភិវឌ្ឍ ហើយវាប្រហែលជាបង្ហាញខ្លួននៅឆ្នាំក្រោយនេះ។
GizmoChina បានធ្វើការសហការជាមួយនឹងអ្នកទម្លាយព័ត៌មាន Yogesh ក្នុងការនាំយកនូវព័តមានថ្មីបំផុតអំពីស្មាតហ្វូន Samsung ដែលអាចបត់បាន 3 ដងនេះ។ នៅក្នុងប្រភពនេះ ស្មាតហ្វូននេះនឹងបង្ហាញខ្លួនជាស្មាតហ្វូន Galaxy Z Fold Tab នៅក្នុងត្រីមាសទី 1 ឆ្នាំ 2022 នេះហើយ។
នៅក្នុងការបែកធ្លាយកាលពីពេលមុននេះ បានបញ្ជាក់ថា ស្មាតហ្វូននេះ នឹងបង្ហាញខ្លួននៅក្នុងឆ្នាំ 2021 នេះ។ ស្មាតហ្វូន Galaxy Z Fold3 និង Galaxy Z Flip3 អាចនឹងបង្ហាញខ្លួននៅក្នុងខែសីហាខាងមុខនេះ។
លក្ខណៈពិសេសរបស់ស្មាតហ្វូន Galaxy Z Fold Tab នេះគឺមានទម្រង់នៃការបត់បាន 3 ដងហើយមានការប្រើប្រាស់ជាមួយនឹង hybrid S Pen ថែមទៀត។ សម្រាប់ប៊ិចនេះ អាចនឹងបង្ហាញខ្លួនជាមួយនឹងស្មាតហ្វូន Galaxy Z Fold3 នៅក្នុងរយៈពេលប៉ុន្មានខែខាងមុខទៀតនេះ។ យើងនៅមិនទាន់មានព័ត៌មានអំពីប៊ិចនេះទេ។ ថេប្លេតដែលអាចបត់បាន 3 បត់នេះនឹងមានអេក្រង់ UTG (ultra-thin glass) ដែលរឹងមាំជាងម៉ូឌែលជំនាន់មុននេះផងដែរ៕