ក្រុមហ៊ុន Microsoft បានប្រកាសចេញនូវម៉ាស៊ីនកុំព្យូទ័រយួរដៃជំនាន់ថ្មីរបស់ខ្លួនម៉ាក Surface Laptop 4 ជាផ្លូវការណ៍។ ជាមួយនឹងម៉ាស៊ីនកុំព្យូទ័រយួរដៃជំនាន់ថ្មីនេះមានជម្រើសម៉ូដែលប្រើប្រាស់អង្គ CPU Intel និង AMD។ Surface Laptop 4 ទាំងពីរជម្រើសនេះបំពាក់មកជាមួយនូវបន្ទះអេក្រង់ទំហំ 13.5 អ៊ីញ និង 15 អ៊ីញដូចគ្នា។
សម្រាប់អង្គ CPU ដែលរបស់ក្រុមហ៊ុនទាំងពីរដែល Microsoft យកមកបំពាក់នៅលើ Surface Laptop 4 របស់ខ្លួនគឺជាជំនាន់ចុងក្រោយ Intel-11th Gen Processor និង AMD Ryzen 4000 Series។ Microsoft Surface Laptop 4 ទាំងពីរជម្រើសនឹងមានចេញលក់នៅទីផ្សារសហរដ្ឋអាមេរិក កាណាដា និងជប៉ុនចាប់ពីថ្ងៃទី 15 ខែមេសា ឆ្នាំ 2021 ស្អែកនេះទៅ ជាមួយតម្លៃខ្ទង់ចាប់ពី $999 ឡើងទៅ។
ជាមួយតម្លៃខ្ទង់ $999 អតិថិជននឹងទទួលបាន Surface Laptop 4 ដែលមានអេក្រង់ទំហំ 13.5 អ៊ីញ បំពាក់នូវអង្គ CPU AMD Ryzen5-4680U មានរ៉េមទំហំ 8GB និងអង្គផ្ទុកទិន្នន័យទំហំ 256GB និងម៉ូដែលប្រើ CPU Intel-11th Gen Core i5-1135G7 មានរ៉េមទំហំ 8GB ជាមួយអង្គផ្ទុកតិន្នន័យទំហំ 512GB។ ហើយប្រសិនបើអថិជនចង់បានម៉ូដែលខ្លាំងជាងហ្នឹងទៀតនោះត្រូវចាយលុយខ្ទង់ $2,299 នោះលោកអ្នកទទួលបាន Surface Laptop 4 ប្រើអង្គ CPU Intel-11th Gen Corei7 មានរ៉េមទំហំ 32GB និងអង្គផ្ទុកទិន្នន័យទំហំ 1TB។ ចំនែកតម្លៃខ្ទង់ $1,199 លោកអ្នកទទួលបាន Surface Laptop 4 បំពាក់អង្គ CPU AMD Ryzen5-4680U មានរ៉េមទំហំ 16GB និងអង្គផ្ទុកទិន្នន័យទំហំ 256GB។
យ៉ាងណាមិញប្រសិនបើលោកអ្នកចង់បាន Microsoft Surface Laptop 4 ដែលមានអេក្រង់ធំទំហំដល់ 15 អ៊ីញលោកអ្នកត្រូវចំនាយលុយខ្ទង់ $1,299 ហើយក្រៅពីទទួលបានអេក្រង់ធំទៅ Microsoft បានផ្តល់នូវកំលាំងម៉ាស៊ីនខ្លាំងផងដែរក្នុងនោះគឺអង្គ CPU AMD Ryzen7-4980U មានរ៉េមទំហំ 8GB និងអង្គផ្ទុកទិន្នន័យទំហំ 256GB និងម៉ូដែលមានរ៉េមទំហំ 16GB ជាមួយអង្គផ្ទុកទិន្នន័យទំហំ 512GB តម្លៃខ្ទង់ $1,699។
ចំនែកម៉ូដែល 15 អ៊ីញដែលប្រើអង្គ CPU Intel-11th Gen Core i7-1185G7 មានរ៉េមទំហំ 16GB និងអង្គផ្ទុកទិន្នន័យ 512GB មានតម្លៃខ្ទង់ $1,799 និងម៉ូដែលខ្ពស់បំផុតគឺ Intel-Core i7-1185G7 មានរ៉េមទំហំ 32GB ជាមួយអង្គផ្ទុកទិន្នន័យទំហំ 1TB មានតម្លៃខ្ទង់ $2,399។
ជាមួយនឹងអង្គ CPU ជំនាន់ថ្មីចុងក្រោយរបស់ក្រុមហ៊ុន Intel និង AMD ដែលប្រើនៅលើកុំព្យូទ័រយួរដៃ Surface Laptop 4 ត្រូវបាន Microsoft អះអាងថាមានល្បឿនដំណើរការខ្លាំងជាងជំនាន់មុនដល់ទៅ 70%។ ជាងនេះទៅទៀតសម្រាប់ថ្មដែលបំពាក់នូវលើ Surface Laptop 4-13.5 អ៊ីង ត្រូវបាន Microsoft បញ្ជាក់ថា សាកមួយពេញម្តងកាន់បានដល់ 19 ម៉ោង ហើយថ្មម៉ូដែល 15 អ៊ីញវិញគឺកាន់បាន 17.5 ម៉ោង។ សម្រាប់រន្ធ I/O Port វិញ Surface Laptop 4 មានរន្ធ USB-C x1, USB-A x1, រន្ធដោតកាស 3.5mm និងរន្ធសាកភ្លើង Surface Connect Port៕