ក្រុមហ៊ុន Apple ត្រូវបានរំពឹងថានឹងប្រកាសចេញទូរស័ព្ទ iOS ជំនាន់ថ្មីស៊េរី 2021 ឬ iPhone 13 Series របស់ខ្លួននៅខែកញ្ញា ឆ្នាំ 2021 ដោយមិនពន្យាពេលដូចឆ្នាំមុននោះទេ ហើយបើតាមរបាយការណ៍ជាច្រើនដែលបានចេញផ្សាយនាពេលកន្លងមក ជាពិសេសរបាយការណ៍របស់កំពូលអ្នកវិភាគផលិតផល iDevices របស់ Apple គឺលោក Ming-Chi Kuo បាននិយាយថា iPhone ដែលចេញឆ្នាំ 2021 គឺមានការ Upgrade តិចតូចប៉ុណ្ណោះពីជំនាន់ iPhone 12 Series ដែលចេញឆ្នាំ 2020។ យ៉ាងណាមិញជារ៉ើយៗលោក Ming-Chi Kuo តែងតែបង្ហើបថា Apple នឹងធ្វើការ Upgrade ធំនៅលើ iPhone ដែលនឹងចេញនៅឆ្នាំ 2022។
លោក Kuo បាននិយាយថា iPhone ស៊េរីឆ្នាំ 2022 គឺនឹងមានតែម៉ូដែលបំពាក់អេក្រង់ទំហំ 6.1 អ៊ីញ និង 6.7 អ៊ីញតែប៉ុណ្ណោះ គឺគ្មានម៉ូដែល 5.4 អ៊ីញ ដែលប្រើលើ iPhone 12 mini បច្ចុប្បន្ននោះទេ ប៉ុន្តែ មានចំនួន 4 ម៉ូដែលដដែល។ ដោយពីរម៉ូដែលគឺជា High-End iPhone Series និងពីរម៉ូដែលជា Lower-End Series ដូចជំនាន់ iPhone 12 Series ដែរ។ បើពិតដូចអ្វីដែលកំពូលអ្នកវិភាគរូបនេះលើកឡើងមែននោះ គឺមានន័យថា Apple នឹងបញ្ចប់ការផលិត iPhone mini Series នៅឆ្នាំ 2022។ ហើយកត្តាដែលធ្វើអោយក្រុមហ៊ុនបច្ចេកវិទ្យាយក្សរបស់អាមេរិកបញ្ចប់សង្វាក់ផលិតកម្ម iPhone mini របស់ខ្លួនព្រោះថា ការលក់ iPhone មួយនេះមិនទទួលបានផលផ្លែផ្កាល្អដូចការរំពឹងទុករបស់ក្រុមហ៊ុនឡើយ។
បើតាមរបាយការណ៍វិភាគរបស់លោក Ming-Chi Kuo បានលើកឡើងក្នុងពេលថ្មីៗនេះ គឺបានព្យាករណ៍ថា Apple នឹងបង្កើនទំហំសែនស័រកាមេរ៉ាឡើងដល់ 48MP ដែលមានលទ្ធភាពអាចផលិតសាច់វីដេអូដល់ កម្រិត 8K សម្រាប់កាមេរ៉ារបស់ High-End iPhone 2022 គឺ iPhone 14 Pro/ 14 Pro Max។ ហើយសម្រាប់ម៉ូដែល Lower-End iPhone 2022 Series នឹងរក្សាសែនស័រទំហំ 12MP ដូចមុន។ លោក Kuo ក៏បានបញ្ជាក់ទៀតថា សម្រាប់លែនកាមេរ៉ា Periscope ដែលកំពុងមានប្រើនៅលើកំពូលស្មាតហ្វូន Android ទាំងឡាយក្នុងពេលបច្ចុប្បន្ននឹងមាននៅលើ iPhone ស៊េរីឆ្នាំ 2023។
គួររំលឹកថា Apple បានចាប់ផ្តើមប្រើប្រាស់សែនស័រកាមេរ៉ាទំហំ 12MP មួយគ្រាប់ដំបូងរបស់ខ្លួននៅលើ iPhone 6s Series ដែលចេញកាលពីខែកញ្ញា ក្នុងឆ្នាំ 2015 និងសែនស័រកាមេរ៉ាទំហំ 12MP ចំនួនពីរគ្រាប់នៅលើ iPhone 7 Plus ដែលចេញក្នុងខែកញ្ញា ក្នុងឆ្នាំ 2016 និងបន្តប្រើរហូតមកដល់ iPhone 12 Series ដែលចេញកាលពីខែតុលា ក្នុងឆ្នាំ 2020 ហើយក៏នឹងបន្តប្រើសម្រាប់ iPhone 13 Series ដែលត្រៀមបង្ហាញវត្តមាននាខែកញ្ញា ក្នុងឆ្នាំ 2021 នេះផងដែរ៕
