HTC Vive គឺជាប្រភេទ VR Hardware ជំនាន់ថ្មីរបស់ក្រុមហ៊ុនបច្ចេកវិទ្យារបស់តៃវ៉ាន់ ដែលមានការពេញនិយមបំផុតរបស់ពិភពលោក។ ក្រុមហ៊ុននេះ ត្រូវបានគេរំពឹងថា នឹងបង្ហាញនូវផលិតផលថ្មីៗជាច្រើននាពេលខាងមុខ ក្នុងនោះក៏និងមានការបង្ហាញថា នៅខែក្រោយនេះ ខ្លួននឹងបង្ហាញនូវផលិតផលថ្មីនៅក្នុងព្រឹត្តិការណ៍ HTC Vivecon ផងដែរ។
បើយោងតាមប្រកាសចេញកាលពីម្សិលមិញនេះ តាមរយៈគណនីរបស់ HTC Vive គឺបាននិយាយថា ព្រឹត្តិការណ៍ Vivecon 2021 នេះ នឹងធ្វើឡើងនៅខែក្រោយនេះហើយ គឺនៅថ្ងៃទី 11 និង 12 ខែឧសភាខាងមុខនេះហើយ។ ព្រឹត្តិការណ៍រយៈពេល 2 ថ្ងៃនេះ នឹងមានការបង្ហាញអំពីកាសស្តាប់ VR headset ផងដែរ។ ក្រុមហ៊ុន HTC ត្រូវគេរំពឹងថា នឹងបង្ហាញនូវឧបករណ៍ All-in-One VR headset ដែលមិនចាំបាច់ត្រូវភ្ជាប់ទៅកាន់កុំព្យូទ័រនោះទេ។
សូមជំរាបថា កាលពីសប្តាហ៍មុននេះ នៅលើប្លុករបស់ HTC នេះ ក៏មានការចែករំលែកអំពីរូបភាពនៃ VR headset ដែលស្ថិតនៅក្រោមក្រណាត់គ្របមួយផងដែរ។ សម្រាប់ VR Headset នេះ គឺនឹងបង្ហាញនៅខែក្រោយនេះ។ បើមើលទៅលើរូបភាពនេះ យើងអាចមើលឃើញទៅលើរូបរាងរបស់វាបាន។ ជាមួយនឹងកាសស្តាប់ VR headset ថ្មីនេះ ក្រុមហ៊ុន HTC អាចនឹងប្រកាសបង្ហាញនូវហ្គេមថ្មីៗ និងមុខងារជាច្រើនទៀតនៅលើ Vive platform ផងដែរ៕