កាលពីយប់មិញនេះ ក្រុមហ៊ុន TCL បានដាក់បង្ហាញចេញនូវគំរូទូរស័ព្ទអេក្រង់បត់ឆ្លាតវៃដំបូងរបស់ខ្លួនដែលមានឈ្មោះថា Fold ‘n Roll Phone។ សម្រាប់លក្ខណៈសម្បត្តិគំរូទូរស័ព្ទអេក្រង់បត់ឆ្លាតវៃ TCL Fold ‘n Roll នេះគឺមានលក្ខណៈខុសពីទូរស័ព្ទអេក្រង់បត់របស់ក្រុមហ៊ុនដទៃគឺថាអេក្រង់របស់ទូរស័ព្ទនេះគឺអាចកាត់បត់ចេញក្រៅ (Foldable Outside) និងអាចរមូលលូតពង្រីកទំហំអេក្រង់ (Rollable Out) បាននៅពេលដែលមិនបត់ (Unfolded)។
ការដែលអាចធ្វើបានទាំងការកាច់បត់ និងរមូលលូតអេក្រង់ចេញបានដូច្នេះ ដោយសារតែ TCL បានធ្វើការច្នៃផលិតចេញនូវគន្លឹះត្រចៀកបត់ (Hings) និងម៉ូទ័ររមូល (Mechanics) ឆ្លាតវៃជំនាន់ថ្មីដែលអាចគាំទ្របានទាំងចលនាក្នុងការកាច់បត់ និងរមូលទាញអេក្រង់ចេញ។ បើតាមការអោយដឹងពី TCL អេក្រង់ដែលប្រើសម្រាប់គំរូទូរស័ព្ទឆ្លាត Fold ‘n Roll ឬអាចហៅម្យ៉ាងទៀតថា All-in-One Phone របស់ខ្លួននេះគឺមានទំហំចាប់ពី 6.78 អ៊ីញ នៅពេលបត់ (Folded), ទំហំ 8.85 អ៊ីញនៅពេលពន្លាមិនបត់ (Unfolded) និងទំហំធំដល់ទៅ 10 អ៊ីញនៅពេលពន្លូតចេញ (Rollable)។ និយាយរួមទៅពាក្យថា All-in-One គឺស្មើរនឹង Smartphone + Phablet + Tablet។
TCL គឺជាក្រុមហ៊ុនបច្ចេកវិទ្យាផលិតបន្ទះអេក្រង់ដ៏មានសក្តានុពលបំផុតមួយក្នុងពិភពលោក និងជាក្រុមហ៊ុនមេរបស់ CSOT ដែលជាក្រុមហ៊ុនផលិតបន្ទះអេក្រង់ដ៏ធំបំផុតមួយរបស់ប្រទេសចិន។ក្រុមហ៊ុននេះមានសង្វាក់ផលិតកម្មអេក្រង់ចាប់ពីបន្ទះអេក្រង់ទូរស័ព្ទរហូតដល់អេក្រង់ទូរទស្សន៍ស្មាតធីវី។ ក្រុមហ៊ុនបុត្រសម្ព័ន្ធរបស់ TCL មួយនេះបានផ្តើមហក់ចូលក្នុងសង្វាក់ផលិតកម្មបន្ទះអេក្រង់ OLED ដំបូងកាលពីត្រីមាសទី 4 ក្នុងឆ្នាំ 2019។
ស្របពេលជាមួយគ្នានេះដែរ TCL បាននឹងកំពុងស្វែងរកភាពជាដៃគូសហការណ៍ដើម្បីអភិវឌ្ឍន៍លើបច្ចេកវិទ្យាកញ្ចក់អេក្រង់ថ្មីនេះ (Foldable & Rollable Screen) ប្រើបាននៅលើផលិតផលតែមួយ ព្រោះថា គំរូអេក្រង់ទូរស័ព្ទឆ្លាត Fold ‘n Roll ដំបូងរបស់ខ្លួននេះគឺប្រើប្រាស់នូវអេក្រង់ Plastic Screen ប៉ុណ្ណោះ។
សរុមមកតើប្រិយមិត្តយល់ឃើញបែបណាដែរសម្រាប់គំរូទូរស័ព្ទឆ្លាតវៃ TCL Fold ‘n Roll មួយនេះ ហើយមើលទៅ TCL អាចសម្រេចបាននូវសមត្ថផលនៃអនាគតទូរស័ព្ទឆ្លាតវៃមួយនេះបានដែរ ឬទេ។ ជាចុងក្រោយក្រុមហ៊ុន TCL ត្រូវបានគេព្យាករណ៍ថានឹងប្រកាសចេញទូរស័ព្ទអេក្រង់បត់ដំបូងរបស់ខ្លួនមួយស៊េរីនៅចុងឆ្នាំ 2021 នេះ ប៉ុន្តែ មិនមែនជាទូរស័ព្ទគំរូមួយនេះឡើយ៕