ថ្មីៗនេះ យោងតាមការបញ្ជាក់របស់លោក Pat Kissinger ដែលជានាយកប្រតិបត្តិរបស់ក្រុមហ៊ុន Intel បានអោយដឹងថា ក្រុមហ៊ុននេះ នឹងធ្វើការវិនិយោគទឹកប្រាក់ជាច្រើនពាន់លានដុល្លារនៅក្នុងសហរដ្ឋអាមេរិក សម្រាប់រោងចក្រផលិតបន្ទះឈីប។ ទឹកប្រាក់ចំនួន 3.5 ពាន់លានដុល្លារអាមេរិក គឺនឹងប្រើប្រាស់នៅក្នុងការ upgrade ទៅលើរោងចក្រ Rio Rancho នៅក្នុង New Mexico។
គួរបញ្ជាក់ថា កាលពីពេលមុននេះ ក្រុមហ៊ុន Intel បានប្រកាសថា ខ្លួននឹងធ្វើការផ្លាស់ប្តូរទៅលើ IDM 2.0 របស់ខ្លួន ហើយរោងចក្រ Rio Rancho នឹងធ្វើការផលិតបន្ទះឈីបសម្រាប់ក្រុមហ៊ុនជាច្រើនហើយបន្ទាប់ពីបញ្ចប់ការ upgrade នេះរួចរាល់ ការផ្គត់ផ្គង់បន្ទះឈីប គឺនឹងមានការកើនឡើង។ កន្លងមក ក្រុមហ៊ុន Intel បានប្រកាសអំពីការវិនិយោគទឹកប្រាក់ចំនួន 20 ពាន់លានដុល្លារអាមេរិក នៅក្នុងការសាងសង់រោងចក្ររបស់ខ្លួននៅក្នុង Arizona និងការស្វែងរកការឧបត្ថម្ភពីរដ្ឋាភិបាលរបស់សហរដ្ឋអាមេរិកផងដែរ។
ទាក់ទងជាមួយនឹងរឿងនេះ លោកនាយកប្រតិបត្តិរបស់ក្រុមហ៊ុន Intel ក៏បានចំណាយពេលទស្សនកិច្ចរយៈពេល 1 ថ្ងៃទៅកាន់អ៊ីស្រាអែលនៅថ្ងៃអាទិត្យនេះ ដើម្បីធ្វើការត្រួតពិនិត្យមើលទៅលើរោងចក្រនេះដែលស្ថិតនៅក្នុងការសាងសង់នោះ។ គាត់ប្រកាសអំពីការវិនិយោគទឹកប្រាក់ចំនួន 600 លានដុល្លារអាមេរិក នៅក្នុងប្រទេសអ៊ីស្រាអែលដើម្បីធ្វើការពង្រីកទៅលើការអភិវឌ្ឍ និងការស្រាវជ្រាវ និងការបង្កើនការផលិតផងដែរ៕
