កន្លងមកមានប្រភពព័ត៌មានជាច្រើនបាននិយាយថា Apple នឹងនាំយកទូរស័ព្ទ iPhone ដែលបំពាក់បន្ទះអេក្រង់ដែលមានកម្រិត refresh rate 120Hz មកកាន់ទីផ្សារក្នុងឆ្នាំ 2021 នេះ។ ហើយឥលូវនេះមានប្រភពព័ត៌មានថ្មីចុងក្រោយមួយចេញពីប្រទេសកូរ៉េខាងត្បូងក៏បានបញ្ជាក់ច្បាស់ថា ជាការពិតណាស់ Apple គឺពិតជានឹងនាំយកទូរស័ព្ទ iPhone ជំនាន់ថ្មីឆ្នាំ 2021 គឺ iPhone 13 Series ដែលមានអេក្រង់កម្រិត 120Hz មកកាន់ទីផ្សារឆ្នាំនេះពិតប្រាកដមែន។
ប្រភពព័ត៌មានដដែលបាននិយាយថា ទូរស័ព្ទ iOS-2021 ដែលនឹងបំពាក់នូវបន្ទះអេក្រង់កម្រិត 120Hz នោះគឺ iPhone 13 Pro និង iPhone 13 Pro Max។ ហើយសម្រាប់បន្ទះអេក្រង់ 120Hz ដែលនឹងបំពាក់នៅលើបងធំ iPhone 13 ទាំងពីរស៊េរីនេះគឺជាប្រភេទបន្ទះបង្ហាញជំនាន់ថ្មី LTPO-AMOLED ដែលផលិតដោយក្រុមហ៊ុន Samsung Display និងប្រើប្រាស់នូវប្រព័ន្ធខ្សែសីមា ឬហៅថា RFPCB (rigid flexible printed circuit boards) របស់ក្រុមហ៊ុន Samsung Eletro-Mechanics សម្រាប់ភ្ជាប់អេក្រង់ជាមួយនឹង Mainboard ទូរស័ព្ទ។
ប្រព័ន្ធខែ្ស RFPCB ថ្មីនេះគឺមានភាពបត់បែបបានល្អ សម្រាប់ទៅតាមទម្រង់នៃការឌីស្សាញតួររបស់ទូរស័ព្ទ ហើយនិងមានការបញ្ចូននូវកម្រិតពន្លឺ Electric Signal បានល្អថែមទៀតផង។ ទោះជាយ៉ាងណាខែ្សសីមាថ្មីនេះគឺមានតម្លៃថ្លៃជាងខែ្សសីមាអេក្រង់ជំនាន់មុន (FPCBs) ដែលប្រើនៅលើ iPhone 12 Series ឆ្នាំមុន។
ក្រុមហ៊ុន Samsung Display ត្រូវបានគេវាយតម្លៃថាគឺជាក្រុមហ៊ុនដ៏សំខាន់ជាងគេក្នុងការផ្គត់ផ្គង់បន្ទះអេក្រង់ OLED ថ្មីរបស់ខ្លួនទៅអោយ Apple ដើម្បីបំពាក់នៅលើទូរស័ព្ទ iOS ជំនាន់ថ្មី។ ក្រុមហ៊ុនកូរ៉េខាងត្បូងនេះត្រូវបានគេព្យាករណ៍ថានឹងផ្គត់ផ្គង់បន្ទះអេក្រង់ LTPO-OLED ដល់ក្រុមហ៊ុន Apple យ៉ាងហោចណាស់ក៏ 110 លានបន្ទះផងដែរក្នុងឆ្នាំនេះ ខណៈក្រុមហ៊ុនពីរទៀតគឺ LG Display និង BOE ក៏ត្រៀមផ្គត់ផ្គង់បន្ទះអេក្រង់ OLED ទៅអោយ Apple ប្រមាណជា 50 លាន និង 9 លានបន្ទះផងដែរសម្រាប់ប្រើនៅលើ iPhone 13 Series ដែលត្រៀមខ្លួនមកដល់នាខែកញ្ញាត្រីមាសទី 3 ឆ្នាំ 2021 ខាងមុខ៕