ថ្មីៗនេះ ក្រុមហ៊ុន Huawei បានធ្វើការបញ្ចេញនូវ Bata version សម្រាប់អ្នកអភិវឌ្ឍកម្មវិធីទៅលើប្រព័ន្ធប្រតិបត្តិការ HarmonyOS របស់ខ្លួនទៅកាន់ស្មាតហ្វូនជាច្រើន។ នៅពេលនេះ ក្រុមហ៊ុននេះ បានប្រកាសថា ខ្លួនបានត្រៀមខ្លួនក្នុងការ បង្ហាញនូវការអាប់ដេតទៅលើ OS នេះ នៅដើមខែមិថុនា ឆ្នាំ 2021 នេះ។
តាមការបញ្ជាក់របស់លោក Wang Chenglu ដែលជាប្រធានផ្នែកអភិវឌ្ឍកម្មវិធី និងជាអគ្គនាយក AI នៃអាជីវកម្មឆ្លាតវៃរបស់ក្រុមហ៊ុនបច្ចេកវិទ្យាយក្សរបស់ចិននេះ បាននិយាយថា ក្រុមហ៊ុននេះ បានត្រៀមនឹងធ្វើការអាប់ដេតទៅលើ HarmonyOS ចាប់ពីដើមខែមិថុនានេះហើយ។ ស្មាតហ្វូនជាច្រើនដែលនឹងទទួលបាននូវការអាប់ដេតនេះគឺមានស្មាតហ្វូន Mate 40 series, Mate 30 series, P40 series និង Mate X2 series ជាដើម។
លោកបានបន្តថា បន្ទាប់ពីការធ្វើការអាប់ដេតទៅលើស្មាតហ្វូនទាំងនេះ ក្រុមហ៊ុន Huawei ក៏នឹងបន្តក្នុងការអាប់ដេតទៅលើស្មាតហ្វូនជាច្រើនម៉ូដែលទៀតរបស់ខ្លួនផងដែរ។ មានស្មាតហ្វូនជាច្រើនរបស់ក្រុមហ៊ុននេះ ហើយស្មាតហ្វូនជាច្រើនរបស់ Honor ក៏នឹងទទួលបាននូវការអាប់ដេតផងដែរនៅក្នុងរដូវក្តៅនេះ។ នេះគឺជាការបោះជំហានដ៏ធំមួយរបស់ក្រុមហ៊ុននេះដែលងាកចេញពីទីផ្សារ Android ដែលខ្លួនមានជាង 200 លានគ្រឿងនោះ។
សូមជំរាបថា ក្រុមហ៊ុនបច្ចេកវិទ្យាយក្សរបស់ចិននេះ ក៏មានគោលដៅក្នុងការផ្លាស់ប្តូរនូវប្រព័ន្ធប្រតិបត្តិការ OS Android របស់ខ្លួនទៅលើស្មាតហ្វូនជាង 200 លានគ្រឿងនៅឆ្នាំនេះផងដែរ។ សម្រាប់ ប្រព័ន្ធប្រតិបត្តិការ HarmonyOS ថ្មីនេះ ក៏នឹងអាចប្រើប្រាស់បាននៅលើ Platforms ជាច្រើនថែមទៀតផង៕
