នៅទីបំផុតក្រុមហ៊ុន Xiaomi បានបង្ហាញនូវ version ថ្មីរបស់ស្មាតហ្វូន Mi 11 Ultra សម្រាប់ទីផ្សារអ៊ឺរ៉ុបហើយ បន្ទាប់ពីក្រុមហ៊ុននេះបានបង្ហាញស្មាតហ្វូននេះជាផ្លូវការនៅក្នុងខែមីនាឆ្នាំនេះ។ ស្មាតហ្វូន Mi 11 Ultra នេះ គឺជាស្មាតហ្វូន Flagship ដំបូងបំផុតរបស់ក្រុមហ៊ុន Xiaomi ដែលបង្ហាញខ្លួននៅក្នុងទីផ្សារអន្តរជាតិ ហើយពេលនេះអតិចិជនជាច្រើននៅអ៊ឺរ៉ុប នឹងទទួលបាននូវស្មាតហ្វូននេះនៅថ្ងៃទី 11 ខែឧសភានេះ។
កាលពីពេលមុននេះ ក្រុមហ៊ុន Xiaomi បានបង្ហាញស្មាតហ្វូន Mi Ultra series នៅក្នុងទីផ្សាររបស់ចិន ប៉ុន្តែស្មាតហ្វូន Mi 11 Ultra នេះ គឺពង្រីកទីផ្សាររបស់ខ្លួនទៅកាន់អន្តរជាតិដែលខុសប្លែកពីស្មាតហ្វូន Mi 10 Ultra ដែលបង្ហាញខ្លួនសម្រាប់ទីផ្សាររបស់ចិនប៉ុណ្ណោះ។ នៅលើ facebook របស់ក្រុមហ៊ុន Xiaomi នៅក្នុងទីផ្សាររបស់ហូឡង់បញ្ជាក់ថា ស្មាតហ្វូន Mi 11 Ultra នឹងបង្ហាញខ្លួននៅថ្ងៃទី 11 ខែឧសភានេះ។
បើទោះបីជានៅមិនទាន់មានការប្រកាសជាផ្លូវការអំពីក្រុមហ៊ុនចែកចាយជាច្រើនទៀតរបស់ក្រុមហ៊ុន Xiaomi នៅក្នុងអ៊ឺរ៉ុបក៏ដោយនោះ យើងដឹងថា ការប្រកាសបង្ហាញវត្តមានរបស់ស្មាតហ្វូននេះនៅក្នុងទីផ្សារអ៊ឺរ៉ុបគឺមិនឆ្ងាយទៀតនោះទេ។ ស្មាតហ្វូន Mi 11 Ultra មានកាមេរ៉ាដ៏អស្ចារ្យជាមួយនឹងអេក្រង់ទំហំ 6.81 អ៊ីង AMOLED ដែលមានកម្រិត Refresh Rate ខ្ពស់ និងបន្ទះឈីប Snapdragon 888 5G ដ៏ខ្លាំងក្លាក្នុងការប្រើប្រាស់ថែមទៀត។
ស្មាតហ្វូន Mi 11 Ultra នេះមានរ៉េម 2 ទំហំនោះគឺទំហំ 8GB និង 12GB ជាមួយនឹងម៉េមូរីទំហំ 256GB និង 512GB។ ស្មាតហ្វូននេះ ប្រើប្រាស់នូវស្បែក MIUI 12 នៅលើប្រព័ន្ធប្រតិបត្តិការ Android 11។ បន្ថែមពីនេះទៀតនោះ ស្មាតហ្វូននេះ មានថាមពលថ្មទំហំ 5000mAh និងបច្ចេកវិទ្យាសាកថ្មលឿន 67W ultra-fast charging, reverse wireless charging 10W ផងដែរ។ អ្វីដែលពិសេស គឺស្មាតហ្វូននេះមាន IP68 សម្រាប់ការពារទឹក និងធូលីផងដែរ។ ស្មាតហ្វូន Mi 11 Ultra នឹងលក់នៅក្នុងអ៊ឺរ៉ុបក្នុងម្លៃចាប់ផ្តើមពី €1,199 ៕
