បន្ទាប់ពីការប្រកាសចេញនូវស្មាតហ្វូន Redmi K40 Gaming edition មក មានព័ត៌មានជាច្រើនថា ស្មាតហ្វូននេះ ត្រូវគេរំពឹងថា នឹង បង្ហាញខ្លួនជាស្មាតហ្វូន POCO F3 GT នៅក្នុងប្រទេសឥណ្ឌា។ បើតាមដឹងនោះ ស្មាតហ្វូននេះ នឹងបង្ហាញខ្លួនជាមួយនឹងស្មាតហ្វូន POCO M3 Pro 5G នៅក្នុងទីផ្សាររបស់ប្រទេសឥណ្ឌា។ ខណៈពេលដែលក្រុមហ៊ុន POCO នៅមិនទាន់បញ្ជាក់អំពីវត្តមានស្មាតហ្វូននេះ ស្រាប់តែហាងលក់អនឡាញមួយ បានទម្លាយនូវលក្ខណៈសម្បត្តិ និងតម្លៃរបស់ស្មាតហ្វូន POCO F3 GT នេះហើយ។
នៅក្នុងបញ្ជីរបស់ក្រុមហ៊ុន WelEletronics នោះ ស្មាតហ្វូន POCO F3 GT ដាក់លក់នៅក្នុងតម្លៃ $1,299 (~Rs 95,000)។ ស្មាតហ្វូននេះ នឹងបង្ហាញខ្លួននៅក្នុងប្រទេសឥណ្ឌាជាមួយនឹងតម្លៃ Rs 25,000 (~$341)។ ដូចនេះ មានការបង្ហាញថា ស្មាតហ្វូនដែលស្ថិតនៅក្នុងបញ្ជីនេះ គឺមានតម្លៃមិនត្រឹមត្រូវនោះទេ។ របាយការណ៍ជាច្រើនមុននេះទម្លាយថា នេះអាចជា Rebrand របស់ស្មាតហ្វូន Redmi K40 Gaming ដែលប្រកាសបង្ហាញខ្លួននៅក្នុងប្រទេសចិន។ ស្មាតហ្វូន POCO F3 GT នេះ គឺបានបង្ហាញខ្លួនជាមួយនឹងលក្ខណៈសម្បត្តិដូចគ្នាទៅនឹងស្មាតហ្វូន Redmi K40 Gaming។
ស្មាតហ្វូននេះមានអេក្រង់ទំហំ 6.67-inch OLED ជាមួយនឹងកម្រិតភាពច្បាស់ Full HD+, 120Hz refresh rate និង Gorilla Glass 5 ។ស្មាតហ្វូននេះមានបន្ទះឈីប Dimensity 1200 chipset និងរ៉េមទំហំ 6GB ។ ស្មាតហ្វូន POCO F3 GT នេះមានម៉េមូរីទំហំ 128 GB UFS 3.1 storage និង microSD card slot សម្រាប់បន្ថែមនូវម៉េមូរីថែមទៀតផង។ ស្មាតហ្វូន F3 GT នេះមានថាមពលថ្មទំហំ 5,065mAh ជាមួយនឹងបច្ចេកវិទ្យា 67W fast charging។
ស្មាតហ្វូន POCO F3 GT នេះ មានប្រព័ន្ធស្កេនក្រយ៉ៅដៃនៅចំហៀង។ នៅមិនទាន់ច្បាស់នោះទេថា ស្មាតហ្វូននេះ នឹងមានប៊ូតុង Trigger Buttons ដូចទៅនឹងស្មាតហ្វូន Redmi K40 Gaming ឬយ៉ាងណានោះទេ។ ស្មាតហ្វូននេះ ត្រូវបានគេនិយាយថា នឹងមានកាមេរ៉ាខាងមុខទំហំ 16-megapixelហើយវាមានកាមេរ៉ាខាងក្រោយទំហំ 64-megapixel, 8-megapixel ultrawide lens និង 2-megapixel macro ។ នៅក្នុងប្រទេសចិននោះ ស្មាតហ្វូន Redmi K40 Gaming នេះគឺលក់នៅក្នុងតម្លៃ 1,999 Yuan (~$312; ~Rs 23,000)៕