ក្រុមហ៊ុន OPPO ត្រូវគេរាយការណ៍ថា កំពុងតែត្រៀមខ្លួនក្នុងការប្រកាសចេញវត្តមានរបស់ស្មាតហ្វូន Reno6 series។ ខណៈពេលដែលវានៅមិនទាន់មានការប្រកាសជាផ្លូវការណ៍នោះ មានការបែកធ្លាយនូវព័ត៌មានថ្មីថា ស្មាតហ្វូន Reno6 series នេះ នឹងបង្ហាញខ្លួននៅថ្ងៃទី 22 ខែឧសភាខាងមុខនេះហើយ។ ដូចទៅនឹងម៉ូឌែលមុននេះដែរ ក្រុមហ៊ុន OPPO អាចនឹងរៀបចំនូវព្រឹត្តិការណ៍ដាច់ដោយឡែកមួយទៀតនៅក្នុងប្រទេសចិន និងទីផ្សារសកលផងដែរ។
កាលបរិច្ឆេទសកលនៃការបង្ហាញវត្តមានរបស់ស្មាតហ្វូន Reno6 Series នេះ ប្រហែលជាមិនយូរទៀតនោះទេខណៈពេលដែលស្មាតហ្វូន Reno6 Pro ត្រូវប្រទះឃើញទទួលបាននូវវិញ្ញាបនបត្រ SIRIM នៅថ្ងៃនេះ។ នៅក្នុងវិញ្ញាបនបត្រ SIRIM នេះបញ្ជាក់ថា ស្មាតហ្វូន OPPO នេះមានលេខម៉ូឌែល CPH2247 ដែលនឹងប្រកាសបង្ហាញខ្លួននៅក្នុងប្រទេសម៉ាឡេស៊ីជាមួយនឹងឈ្មោះហៅថា Reno6 Pro ។ស្មាតហ្វូនដែលមានលេខម៉ូឌែល CPH2247 នេះក៏ប្រទះឃើញនៅក្នុង Eurasian Economic Commission (EEC) របស់អ៊ឺរ៉ុប និង TKDN របស់ប្រទេសឥណ្ឌូនេស៊ីផងដែរ។ នៅក្នុងបញ្ជីនេះនៅមិនទាន់មានការទម្លាយអំពីលក្ខណៈសម្បត្តិណាមួយអំពីស្មាតហ្វូន Reno6 Pro នៅឡើយទេ។
ពាក្យចចាមអារ៉ាមជាច្រើននិយាយថា ស្មាតហ្វូន Reno6 series នេះគឺមាន 3 ម៉ូឌែលនោះគឺ Reno6, Reno6 Pro និង Reno6 Pro+ ។ ស្មាតហ្វូនដែលមានលេខកូដ PENM0 ដែលបង្ហាញខ្លួននៅលើវិញ្ញាបនបត្រ 3C របស់ចិននោះគឺជាស្មាតហ្វូន Reno6 ។ ស្មាតហ្វូន Reno6 Pro គឺមានលេខម៉ូឌែល PEPM00 ។ ស្មាតហ្វូនទាំងពីរនេះបង្ហាញខ្លួននៅលើ TENAA ប៉ុន្តែលក្ខណៈសម្បត្តិ និងរូបភាពជាច្រើនរបស់វានៅមិនទាន់ទម្លាយនៅឡើយទេ។
ស្មាតហ្វូន Reno6 នេះ គឺមានបន្ទះឈីប Dimensity 1200 ខណៈពេលដែលស្មាតហ្វូន Reno6 Pro និង Pro+ ប្រហែលជានឹងប្រើប្រាស់នូវបន្ទះឈីប Snapdragon 870 និង Snapdragon 888 SoC។ ស្មាតហ្វូនទាំង 3 នេះ ត្រូវបានគេបញ្ជាក់ថា គឺនឹងមានថាមពលថ្មទំហំ 4,500mAh និងបច្ចេកវិទ្យាសាកថ្ម 65W rapid charging ផងដែរ។ ស្មាតហ្វូន Reno6 នេះគឺមានអេក្រង់ទំហំ 6.55 អ៊ីង AMOLED FHD+ ជាមួយនឹងគែមកោងផងដែរ។ ស្មាតហ្វូននេះ មានកាមេរ៉ាទំហំ 32-megapixel និង64-megapixel។ ស្មាតហ្វូននេះ មានរ៉េមទំហំ 12GB និងម៉េមូរីទំហំ 256GB ផងដែរ៕