រហូតមកដល់ពេលនេះ ក្រុមហ៊ុន Samsung បានបញ្ចេញនូវស្មាតហ្វូន Flagships ដ៏ខ្លាំងក្លាជាច្រើននៅលើទីផ្សារ ប៉ុន្តែកក្រុមហ៊ុនបច្ចេកវិទ្យានេះ នៅមិនទាន់បញ្ចេញនូវស្មាតហ្វូនរបស់ខ្លួនសម្រាប់ប្រជែងនៅលើទីផ្សារហ្គេមនៅឡើយទេ។ នៅក្នុងពេលនេះ មានក្រុមហ៊ុនផលិតស្មាតហ្វូនជាច្រើន ដែលបញ្ចេញនូវស្មាតហ្វូនជាច្រើនដែលផ្តោតសម្រាប់ទីផ្សារអ្នកលេងហ្គេម។ នៅក្នុងព័ត៌មានចុងក្រោយនេះ ក្រុមហ៊ុននេះ សោកស្តាយដែលខ្លួននៅមិនទាន់បានបញ្ចេញនូវស្មាតហ្វូនមួយដែលត្រឹមត្រូវសម្រាប់លេងហ្គេមនៅលើទីផ្សារនោះ។
តាមការបញ្ជាក់របស់ LetsGoDigital គឺបានបង្ហាញថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ គឺបានស្នើទៅកាន់ការិយាល័យកម្មសិទ្ធិបញ្ញាសហភាពអ៊ឺរ៉ុប (EUIPO) ដើម្បីចុះបញ្ជីទៅលើពាក្យថា Activate Fan Mode និង Unleash Your Fan Power។ បច្ចេកវិទ្យាថ្មីនេះ គឺនឹងផ្តល់អោយអ្នកប្រើប្រាស់ជាច្រើនអាចធ្វើការបិទ និងបើកទៅលើប្រព័ន្ធត្រជាក់របស់ស្មាតហ្វូនបាន។ នៅក្នុងឯកសារនេះ ថែមទាំងមានការបញ្ជាក់ទៀតថា ពាក្យនេះ គឺនឹងប្រើប្រាស់នៅលើថេប្លេត និងស្មាតហ្វូន។
គួរបញ្ជាក់ថា នៅក្នុងពេលបច្ចុប្បន្ននេះ ក្រុមហ៊ុន Samsung នៅមិនទាន់មានស្មាតហ្វូនណាដែលមានប្រព័ន្ធត្រជាក់ដូចជាកង្ហារនោះទេ។ ដូចនេះ ក្រុមហ៊ុននេះ ត្រូវបានគេសង្ស័យថា បានត្រៀមខ្លួនក្នុងការបញ្ចេញនូវស្មាតហ្វូនថ្មីដែលផ្តោតទៅលើប្រព័ន្ធកង្ហារសម្រាប់អ្នកគាំទ្រលេងហ្គេមនៅលើទូរស័ព្ទនោះ។ ក្រុមហ៊ុន Samsung នៅមិនទាន់និយាយអំពីស្មាតហ្វូននេះទេ។
ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង Samsung នឹងមានការបង្ហាញនូវស្មាតហ្វូន flagship ថ្មីរបស់ខ្លួននៅចុងរដូវក្តៅខាងមុខនេះ គឹនៅក្នុងខែសីហានេះ។ ក្រុមហ៊ុននេះ ក៏អាចនឹងបញ្ចេញនូវស្មាតហ្វូន Galaxy S21 FE, Galaxy Z Fold 3 និង Galaxy Z Flip 3 ផងដែរ។ ស្មាតហ្វូន 2 ចុងក្រោយនេះ គឺជាស្មាតហ្វូនដែលអាចបត់បាន។ ជាធម្មតា នៅចុងខែសីហានេះ ក្រុមហ៊ុន Samsung នឹងប្រកាសបង្ហាញនូវស្មាតហ្វូន Galaxy Note ស៊េរីថ្មីរបស់ខ្លួន៕
