ស្មាតហ្វូន Honor 50 និង Honor 50 Pro ត្រូវបានគេដឹងថា គឺគ្រោងនឹងធ្វើការប្រកាសចេញជាផ្លូវការណ៍នៅក្នុងប្រទេសចិននៅថ្ងៃទី 16 ខែមិថុនាខាងមុខនេះហើយ។ នៅថ្ងៃនេះ យោងតាមការទម្លាយរបស់លោក Ishan Agarwal បានទម្លាយចេញអំពីការឌីស្សាញ និងពណ៌របស់ស្មាតហ្វូន Honor ប្រភេទ Pro ផងដែរ។ រូបភាពនេះ គឺមានការបង្ហាញអំពីអេក្រង់របស់ស្មាតហ្វូន Honor 50 Pro ដែលមានគែមកោងនៅគែមខាងឆ្វេង ហើយនិងគែមខាងស្តាំរបស់ស្មាតហ្វូននេះផងដែរ។ នៅលើគែមខាងលើខាងឆ្វេងរបស់ស្មាតហ្វូននេះគឺមានរន្ធប្រភេទ Pill-Shapes ដែលនឹងមានកាមេរ៉ាភ្លោះនៅខាងមុខ។
នៅលើបញ្ជីរបស់ AnTuTu បានអោយដឹងថា ស្មាតហ្វូននេះ មានអេក្រង់កម្រិតភាពច្បាស់ 2676x1236 pixels ហើយនិង មានកម្រិតអេក្រង់ 120Hz Refresh Rate។ ស្មាតហ្វូន Honor 50 Pro នេះ មានអេក្រង់ទំហំ 6.72-inch OLED ដែលធ្លាប់បានប្រើប្រាស់នៅលើស្មាតហ្វូន Honor V40 5G កាលពីដើមឆ្នាំនេះផងដែរ។ ផ្នែកខាងក្រោយរបស់ស្មាតហ្វូន Honor 50 Pro នេះ គឺមានរង្វង់ Rings ចំនួន 2 ដែលមានកាមេរ៉ាទំហំ 108-megapixel និងភ្លើង LED Flash ផងដែរ។
សូមជំរាបថា រហូតមកដល់ពេលនេះ គឺនៅមិនទាន់មានការបញ្ជាក់អំពីទំហំថ្មរបស់ស្មាតហ្វូន Honor 50 Pro នៅឡើយនោះទេ ប៉ុន្តែនៅក្នុងវិញ្ញាបនបត្រ 3C គឺមានការទម្លាយថា ស្មាតហ្វូនជំនាន់ថ្មីនេះ គឺនឹងមានឆ្នាំងសាកដែលមានកម្រិត 100W fast charger ផងដែរ។ ស្មាតហ្វូន Honor 50 Pro ត្រូវបានគេ បញ្ជាក់ថា គឺនឹងមាន 4 ពណ៌សម្រាប់ធ្វើការជ្រើសរើស គឺពណ៍ Bright Black, Summer Amber, First Snow Crystal និង Jade Blue ផងដែរ៕