ត្រឹមតែ 1 សប្តាហ៍ប៉ុណ្ណោះការតម្លើងប្រព័ន្ធប្រតិបត្តិការ HarmonyOS 2.0 គឺបានកើនឡើងឈានដល់ទៅ 10 លានគ្រឿង

កាលពីសប្តាហ៍មុននេះ ក្រុមហ៊ុន Huawei បានប្រកាសជាផ្លូវការនូវប្រព័ន្ធប្រតិបត្តិការ HarmonyOS 2.0 របស់ខ្លួនរួមជាមួយនឹងផលិតផលថ្មីៗជាច្រើនទៀតដែលត្រូវបានដាក់អោយដំណើរការនូវប្រព័ន្ធប្រតិបត្តិការនេះ។ គម្រោងផែនការរបស់ក្រុមហ៊ុននេះ គឹបានធ្វើការងារបានយ៉ាងល្អ ដោយអាចដាក់អោយប្រព័ន្ធប្រតិបត្តិការនេះបាននៅលើឧបករណ៍ជាច្រើនប្រភេទផ្សេងគ្នា។ ចំនួនឧបករណ៍ដែលបានប្រើប្រាស់ទៅលើប្រព័ន្ធប្រតិបត្តិការ HarmonyOS 2.0 នេះគឺមានច្រើនលានគ្រឿងមែនទែន។ នេះពិតជាជោគជ័យដ៏ខ្លាំងមែនទែនរបស់ក្រុមហ៊ុននេះ។

ក្រុមហ៊ុន Huawei បានចំណាយពេលវេលា 1 សប្តាហ៍ក្នុងការតម្លើងនូវប្រព័ន្ធប្រតិបត្តិការ HarmonyOS 2.0 នៅលើឧបករណ៍ច្រើនជាង 10 លានគ្រឿង។ តួរលេខនេះ គឺពិតជាអស្ចារ្យមែនទែន។ ដើម្បីអបអរសាទរទៅលើជោគជ័យនេះ វាមានរូបភាពជាច្រើនដែលមានការបង្ហាញថាប្រព័ន្ធប្រតិបត្តិការជាច្រើនអាចតម្លើងបានចាប់ពីនៅលើកាសស្តាប់រហូតដល់នៅលើទូរទស្សន៍។ ក្រុមហ៊ុននេះ ពិតជាអបអរសាទរនៅក្នុងការចាប់ផ្តើមដ៏ល្អបំផុតនេះ។ ក្រុមហ៊ុននេះ ចង់ប្រាប់ទៅកាន់អ្នកគ្រប់គ្នាថាប្រព័ន្ធប្រតិបត្តិការ HarmonyOS 2.0 នេះ អាចនឹងប្រើប្រាស់ដោយក្រុមហ៊ុនជាច្រើនទៀតនៅលើទីផ្សារ។ នៅចុងឆ្នាំនេះ ក្រុមហ៊ុននេះមានគោលដៅក្នុងការតម្លើងនូវប្រព័ន្ធប្រតិបត្តិការ HarmonyOS រហូតដល់ទៅ 360 លានគ្រឿង។

ទន្ទឹមនឹងរឿងនេះដែរ ក្រុមហ៊ុននេះ ក៏មានការធ្លាក់ចុះទៅលើចំនែកទីផ្សារស្មាតហ្វូនខ្លាំងផងដែរ។ នៅក្នុងការវិភាគរបស់ក្រុមហ៊ុន Counterpoint Research បានបង្ហាញថា នៅក្នុងត្រីមាសទី 1 នៅក្នុងឆ្នាំនេះ ចំនែកទីផ្សាររបស់ក្រុមហ៊ុន Huawei គឺមានចំនួន 4% ប៉ុណ្ណោះ ខណៈពេលដែលកាលពី 9 ខែមុននេះគឺមានចំនួនដល់ទៅ 20% ។ ក្រុមហ៊ុន realme វិញនោះក៏មានចំណែកទីផ្សារដូចទៅនឹងក្រុមហ៊ុននេះផងដែរ ក្រោយពេលដែលចូលទៅក្នុងទីផ្សារត្រឹមតែ 3 ឆ្នាំប៉ុណ្ណោះ៕