គិតចាប់តាំងពីឆ្នាំ 2019 កន្លងមក សង្គ្រាមពាណិជ្ជកម្មរវាងសហរដ្ឋអាមេរិក-ចិន ត្រូវបានគេមើលឃើញថា ក្រុមហ៊ុនបច្ចេកវិទ្យា Huawei គឺទទួលបាននូវការហាមប្រាមជាច្រើនជាងគេនៅក្នុងសហរដ្ឋអាមេរិក។ ក្រុមហ៊ុនបច្ចេកវិទ្យាយក្សរបស់ចិននេះ ត្រូវបានគេដាក់នៅក្នុងបញ្ជីខ្មៅរបស់រដ្ឋាភិបាលរបស់សហរដ្ឋអាមេរិក ដែលបានធ្វើអោយក្រុមហ៊ុន Huawei ពិតជាពិបាកមែនទែនក្នុងការបន្តនូវអាជីវកម្មជាមួយនឹងផ្នែក hardware ។
ក្រុមហ៊ុន Huawei ជាមួយនឹងក្រុមហ៊ុនបុត្រសម្ព័ន្ធជាង 70 គឺត្រូវបានហាមប្រាមក្នុងការធ្វើអាជីវកម្មជាមួយនឹងក្រុមហ៊ុនជាច្រើន ដែលមានមូលដ្ឋាននៅក្នុងសហរដ្ឋអាមេរិក និងការប្រើប្រាស់នូវបច្ចេកវិទ្យាជាច្រើន ដែលធ្វើការអភិវឌ្ឍនៅក្នុងសហរដ្ឋអាមេរិក។ នៅក្នុងបញ្ជីនេះ ក៏មានក្រុមហ៊ុនជាច្រើនទៀត ដែលមានមូលដ្ឋាននៅក្នុងប្រទេសចិនផងដែរ។ នៅចំពេលដែលមានសង្គ្រាមពាណិជ្ចកម្មនេះ ប្រទេសចិន គឺបានធ្វើអោយក្រុមហ៊ុននេះ បានបង្កើននូវសមត្ថភាពយ៉ាងខ្លាំងនៅក្នុងការក្លាយខ្លួនជាក្រុមហ៊ុនឯករាជ្យនៅក្នុងវិស័យជាច្រើននៃបច្ចេកវិទ្យា ក្នុងនោះមានដូចជា ការផលិតនូវបន្ទះឈីបផងដែរ។ ជាពិសេសក្រុមហ៊ុននេះ ក៏បានធ្វើការជាមួយនឹងបច្ចេកវិទ្យាជាច្រើនទៀតផងដែរនោះគឺ AI, ML, 6G រួមជាមួយនិងដៃគូជាច្រើនថែមទៀតផង។
ប្រភពខាងលើនេះ បានបញ្ជាក់ថា មួយរយៈចុងម្រោយនេះ ដោយសារតែមើលឃើញពីការរីកចម្រើនយ៉ាងឆាប់របស់ប្រទេសចិននោះ គឺបានធ្វើអោយសហរដ្ឋអាមេរិក បានធ្វើការនៅក្នុងវិស័យបច្ចេកវិទ្យាជាច្រើន ហើយប្រទេសមហាអំណាចមួយនេះ ក៏ទើបតែបានចំណាយទឹកប្រាក់ជាង $54.2 ពាន់លានដុល្លារអាមេរិកទៀត ដើម្បីបង្កើននូវការសមត្ថភាពសម្រាប់ក្រុមហ៊ុនជាច្រើនរបស់សហរដ្ឋអាមេរិកនៅក្នុងប្រកួតប្រជែងជាមួយក្រុមហ៊ុនចិនផងដែរ។
គួរបញ្ជាក់ថា មូលហេតុសំខាន់ដែលក្រុមហ៊ុន Huawei ត្រូវបានដាក់នៅក្នុងបញ្ជីខ្មៅនោះ គឺដោយសារតែក្រុមហ៊ុននេះ ត្រូវបានមន្ត្រីជាច្រើនរបស់សហរដ្ឋអាមេរិក បានចោទប្រកាន់ថា ក្រុមហ៊ុននេះ គឺមានការពាក់ព័ន្ធទៅនឹងហានិភ័យសុវត្ថិភាព ដែលមានទំនាក់ទំនងជាមួយនឹងយោធារបស់ចិន និងទីភ្នាក់ងារសុវត្ថិភាពជាច្រើនទៀត ក៏ប៉ុន្តែ ក្រុមហ៊ុន Huawei ក៏បានចេញមកបដិសេធជាច្រើនលើកច្រើនសារដែរ អំពីការអះអាងរបស់សហរដ្ឋអាមេរិកនេះ។ ហើយរហូតមកដល់ពេលនេះសហរដ្ឋអាមេរិក ក៏មិនបានរកឃើញនូវភស្តុតាងជាក់លាក់ណាមួយសម្រាប់ទៅលើការចោទប្រកាន់ក្រុមហ៊ុននេះនោះទេ។ សូមជំរាបថា ប្រាក់ចំណូលសម្រាប់ត្រីមាសដំបូងរបស់ក្រុមហ៊ុន Huawei គឺមានធ្លាក់ចុះចំនួន 16.5 ភាគរយ ដែលប្រហាក់ប្រហែល 152.2 ពាន់លានយ៉ន់ ប្រៀបធៀបជាមួយនិងរយៈពេលដូចគ្នាកាលពីឆ្នាំមុនគឺមានចំនួន 182,2 ពាន់លានយ័ន (28.1 ពាន់លានដុល្លារ)។ ការធ្លាក់ចុះនេះ គឺដោយសារតែអាជីវកម្មស្មាតហ្វូនរបស់ខ្លួន ដែលជាអ្នករកប្រាក់ចំណូលដ៏សំខាន់របស់ក្រុមហ៊ុននេះកំពុងធ្លាក់ចុះខ្លាំង៕