ដោយសារតែតម្លៃទាបរបស់ស្មាតហ្វូន iPhone ជំនាន់ថ្មីនេះ សមត្ថភាពនៃការលក់របស់ក្រុមហ៊ុន Apple នៅក្នុងប្រទេសចិនគឺបន្តមានការកើនឡើងខ្លាំងនៅក្នុងខែមេសានេះ។ នៅដើមឆ្នាំនេះ ក្រុមហ៊ុន Apple បានបិទនូវហាងជាច្រើនរបស់ខ្លួននៅក្នុងប្រទេសចិនដោយសារតែមេរោគកូរ៉ូណាវីរុស។ ជាក់ស្តែង ដោយសារតែមេរោគនេះ ក៏បណ្តាលអោយមានការធ្លាក់ចុះខ្លាំងទៅលើការលក់ iPhone។ ក្រោយមក នៅពេលដែលការផលិតចាប់ផ្តើមដំណើរការនៅក្នុងប្រទេសចិន ហាងលក់ជាច្រើនរបស់ក្រុមហ៊ុន Apple ក៏បានបើកដំណើរការឡើងវិញផងដែរ។
ក្រុមអ្នកវិភាគជាច្រើននៅតែព្រមានក្រុមហ៊ុននេះថា វានឹងប្រឈមទៅនឹងបញ្ហាប្រកួតប្រជែងជាច្រើននៅក្នុងទីផ្សាររបស់ចិន។ នៅក្នុងទិន្នន័យដែលចងក្រងដោយក្រុមហ៊ុនបច្ចេកវិទ្យាជាច្រើន បានបង្ហាញថា ក្រុមហ៊ុន Apple គឺមានស្ថានភាពកាន់តែប្រសើរឡើងៗចាប់ពីខែកុម្ភៈនៅក្នុងឆ្នាំនេះ។ ការលក់ iPhones នៅក្នុងប្រទេសចិន គឺមានការធ្លាក់ចុះចំនួន 60% នៅក្នុងខែកុម្ភៈឆ្នាំនេះ។ នៅពាក់កណ្តាលខែមីនានេះ ហាងទាំងអស់នៅក្នុងប្រទេសចិនបានបើកទ្វារឡើងវិញ។
តាមការបញ្ជាក់នៅក្នុងទិន្នន័យរបស់ក្រុមហ៊ុន CINNO Research នោះ ក្រុមហ៊ុន Apple លក់ស្មាតហ្វូន iPhones បានចំនួន 3.9 លានគ្រឿងនៅក្នុងប្រទេសចិននៅក្នុងខែមេសានេះដែលមានការកើនឡើង 160% ពីចំនួន 1.56 លានគ្រឿង នៅក្នុងខែមីនា។ នៅក្នុងទិន្នន័យរបស់ IDC នេះ មានការបង្ហាញថា ការលក់ស្មាតហ្វូនរបស់ក្រុមហ៊ុន Apple នៅក្នុងខែមេសានេះ គឺមានប្រហែលជា 3 លានគ្រឿងដែលមានការកើនឡើងដល់ទៅ 30% បើធៀបទៅនឹងខែមុននេះ។ ការនាំចេញនេះ គឺផ្អែកទៅលើតួរលេខនៃការលក់ iPhones ទៅកាន់ក្រុមហ៊ុនចែកចាយនៅក្នុងប្រទេសចិន។នៅក្នុងទិន្នន័យចេញពីវិទ្យាស្ថានព័ត៌មាននិងគមនាគមន៍ចិនបានឱ្យដឹងថាការនាំចេញស្មាតហ្វូនរបស់ប្រទេសចិននៅក្នុងខែមេសាឆ្នាំនេះបានកើនឡើង 94 ភាគរយពីមួយខែទៅមួយខែដល់ 40.8 លានគ្រឿង។
WPIC បានចង្អុលបង្ហាញថា ចំនួននៃផលិតផលដែលលក់បានរបស់ក្រុមហ៊ុន Apple តាមរយៈហាង Tmall នៅក្នុងខែមេសានេះនៅក្នុងឆ្នាំនេះគឺមានការកើនឡើង 40% បើធៀបទៅនឹងឆ្នាំមុននេះ គឺចំនួនដល់ទៅ 40% លានដុល្លារអាមេរិក។ ការលក់ iPhones នៅលើ Tmall នេះគឺមានការកើនឡើង 33% បើធៀបទៅនឹងខែមុននេះ ដែលមានទឹកប្រាក់ច្រើនជាង 80 លានដុល្លារអាមេរិក។ នៅក្នុងរយៈពេលដូចគ្នានេះផងដែរ វាក៏មានសញ្ញាជាច្រើនដែលបង្ហាញថា ប្រាក់ចំណេញនៃសេវាកម្មរបស់ក្រុមហ៊ុន Apple នេះ ក៏មានការកើនឡើងផងដែរ។ ទោះបីជាក្រុមហ៊ុន Apple មានសេវាកម្មជាច្រើនដូចជា Apple Music និង iCloud បច្ចុប្បន្ននេះគេអាចប៉ាន់ស្មានបានតាមរយៈការចំណាយនៅលើតែ App Store ប៉ុណ្ណោះ។ តាមការបញ្ជាក់នៅក្នុងទិន្នន័យរបស់ Sensor Tower បានបង្ហាញថា នៅក្នុងខែមេសានេះគឺមានចំនួន 1.53 ពាន់លានដុល្លារដែលមានការកើនឡើង 7% បើធៀបទៅនឹងខែមុននេះ៕