Twitter ផ្លូវការរបស់ Nokia បានបង្ហាញវីដេអូផ្សព្វផ្សាយរបស់ Nokia 8.3 5G ដែលនឹងបង្ហាញខ្លួននៅក្នុងពេលឆាប់ៗនេះ

កាលពីខែមីនាកន្លងទៅនេះ ក្រុមហ៊ុន Nokia បានបង្ហាញនូវស្មាតហ្វូន 5G ដំបូងបំផុតរបស់ខ្លួន Nokia 8.3 5G នៅក្នុងព្រឹត្តិការណ៍អនឡាញមួយ ដែលមានការបង្ហាញអំពីលក្ខណៈសម្បត្តិ និងតម្លៃរបស់វាផងដែរ។ នៅថ្ងៃនេះ ក្រុមហ៊ុន Nokia បានបង្ហើបថា ស្មាតហ្វូននេះ នឹងអាចរកទិញបាននៅអ៊ឺរ៉ុបនៅក្នុងរដូវក្តៅនេះហើយ។ 

យោងតាមការបង្ហាញព័ត៌មាននៅក្នុងវីដេអូផ្សព្វផ្សាយពាណិជ្ជកម្មនៅលើទំព័រ Twitter ផ្លូវការដែលបានបញ្ចេញដោយក្រុមហ៊ុន Nokia គឺបញ្ជាក់ថា ស្មាតហ្វូននេះនឹងបង្ហាញខ្លួននៅក្នុងពេលឆាប់ៗនេះ ប៉ុន្តែកាលបរិច្ឆេទជាក់លាក់របស់វានៅមិនទាន់ទម្លាយនៅឡើយទេ។ គេរំពឹងថាក្រុមហ៊ុននេះនឹងបង្ហាញកាលបរិច្ឆេទនៅក្នុងពេលប៉ុន្មានថ្ងៃខាងមុខនេះ

គួររំលឹកផងដែរថា ស្មាតហ្វូន Nokia 8.3 5G នេះគឺមានអេក្រង់ 6.81 អ៊ីង PureDisplay ជាមួយនឹងកម្រិតភាពច្បាស់ FHD+ រន្ធប្រហោង punch-hole និងកម្រិត 20:9 aspect ratio។ ស្មាតហ្វូននេះ មានបន្ទះឈីប Pixelworks ដែលអាចធ្វើការបម្លែងពី SDR ទៅកាន់ HDR Content។ ស្មាតហ្វូននេះ មានបន្ទះឈីប Snapdragon 765G ជាមួយនឹងរ៉េមទំហំ 6GB ឬ 8GB  LPDDR4X RAM និងមេម៉ូរីទំហំ 64GB ឬ 128GB។ សម្រាប់ការថតរូបភាពវិញនោះ ស្មាតហ្វូននេះ គឺមានកាមេរ៉ា 4 គ្រាប់ដែលមានទំហំ 64MP, 12MP ultra wide angle, 2MP depth sensor និង 2MP macro។ កាមេរ៉ាទាំង 4 នេះ គឺមានមុខងារ ZEISS optics ។ អេក្រង់ខាងមុខរបស់វាគឺមានរន្ធប្រហោង 24MP នៅលើរន្ធប្រហោង  punch-hole។

ក្រុមហ៊ុន Nokia បានបន្ថែមថា ស្មាតហ្វូន Nokia 8.3 5G នេះ មានការទ្រទ្រង់ទៅលើបច្ចេកវិទ្យា 5G bands ដែលច្រើនជាងស្មាតហ្វូនផ្សេងទៀតនៅលើពិភពលោកនេះ។ ស្មាតហ្វូននេះ មិនត្រឹមតែទ្រទ្រង់ទៅលើ 600MHz bands ប៉ុណ្ណោះទេ ប៉ុន្តែវាក៏ទ្រទ្រង់នូវកម្រិត 3.8GHz High-bands ផងដែរ។ ស្មាតហ្វូននេះ មានតម្លៃចាប់ផ្តើម 599យូរ៉ូ និងមានពណ៌  Polar Night យ៉ាងទាក់ទាញបំផុត៕