ថ្មីៗនេះ ក្រុមហ៊ុន Sony បានប្រកាសថា ព្រឹត្តិការណ៍ Sony គឺនឹងធ្វើឡើងនៅថ្ងៃទី 4 ខែមិថុនានេះហើយ ដែលនេះគឺជាការ បង្ហាញនូវផលិតផលលេងហ្គេមជំនាន់ថ្មីរបស់ខ្លួន។ នៅថ្ងៃនេះ យោងតាមព័ត៌មានចុងក្រោយ បានបញ្ជាក់ថា ព្រឹត្តិការណ៍នៃការប្រកាសចេញនូវ PlayStation 5 បានពន្យារពេលក្នុងការបង្ហាញខ្លួនជាផ្លូវការហើយ។ ក្រុមហ៊ុននេះ បាននិយាយថា “យើងដឹងថា អ្នកលេងហ្គេមជាច្រើននៅជុំវិញពិភពលោក គឺមានភាពរីករាយក្នុងការឃើញវត្តមានរបស់ PlayStation 5 នេះ តែពេលនេះ យើងនៅមិនទាន់មានអារម្មណ៍ថា នេះគឺជាពេលវេលាសមរម្យ ក្នុងការបង្ហាញនូវផលិតផលលេងហ្គេមនេះនៅឡើយទេ។”
ក្រុមហ៊ុន Sony បានបន្តថា យោងទៅលើការតវ៉ាជាច្រើននៅក្នុងសហរដ្ឋអាមេរិក និងនៅជុំវិញពិភពលោក ដែលជាការឆ្លើយតបទៅនឹងការស្លាប់របស់លោក Geroge Floyd នោះ ក៏ជាព្រឹត្តិការណ៍មួយដែលមានការកើនឡើងកាន់តែខ្លាំងឡើងៗផងដែរ។ ក្រុមហ៊ុន Sony នៅមិនទាន់ទម្លាយអំពីកាលបរិច្ឆេទថ្មីនៃព្រឹត្តិការណ៍នេះនៅឡើយទេ ប៉ុន្តែយើងរំពឹងថា នឹងទទួលបាននូវព័ត៌មាននេះក្នុងពេលឆាប់ៗនេះ។ ក្រុមហ៊ុន Sony ដែលមានមូលដ្ឋាននៅក្នុងប្រទេសជប៉ុនគ្រោងនឹងរៀបចំនូវព្រឹត្តិការណ៍មួយនៅក្នុងថ្ងៃព្រហស្បតិ៍នេះ។
រហូតមកទល់ពេលនេះ ក្រុមហ៊ុននេះ ក៏ទម្លាយអំពីឡូហ្គោរបស់ឧបករណ៍ PlayStation 5 នេះផងដែរ។ ក្រុមហ៊ុននេះ នៅមិនទាន់មានការបង្ហាញនូវ Gaming Sonsole នេះនៅឡើយទេ។ ក្រុមហ៊ុននេះ បានបញ្ជាក់ថា ឧបករណ៍ PlayStation 5 នឹងមានភ្ជាប់ជាមួយនឹង AMD hardware ជាមួយនឹង Zen 2 CPU និងNavi GPU ជាមួយនឹង PCIe 4.0 SSD ដែលមានល្បឿនលឿន និងស្ថាបត្យកម្មនៃការផ្ទេរទិន្នន័យថ្មីថែមទៀត។ កាន់តែពិសេសជាងនេះទៀតនោះ វាក៏មានភ្ជាប់ជាមួយនឹង DualSense gamepad ដែលផ្តល់នូវអារម្មណ៍ខ្ពស់ និងទំនុកចិត្តក្នុងការលេងហ្គេមបំផុត៕