ក្នុងឆ្នាំនេះ ក្រុមហ៊ុនផលិតស្មាតហ្វូនរបស់ចិន vivo បានខិតខំយ៉ាងខ្លាំងទៅលើការផលិតស្មាតហ្វូនដំណើរការដោយប្រព័ន្ធបណ្តាញសេវា 5G។ ហើយជាលទ្ធផលក្រុមហ៊ុនទទួលបានជោគជ័យដ៏គាប់ប្រសើរសម្រាប់ទីផ្សាររបស់ខ្លួន ហើយជាពិសេសក្រុមហ៊ុននេះក៏ផលិតចេញស្មាតហ្វូនដែលប្រើកំពូលឈីប Snapdragon 865 មានតម្លៃធូរថ្លៃបំផុតគឺចាប់ពី $421 ក៏ដូចជាស្មាតហ្វូនដែលប្រើបន្ទះឈីប MediaTek Dimensity 1000 5G ជាដើម។
មិនទាន់អស់អាវុធបាញ់នៅឡើយទេដោយកាលពីរាត្រីយប់មិញនេះ vivo បានប្រកាសចេញស្មាតហ្វូនជំនាន់ថ្មីរបស់ខ្លួនដែលមានឈ្មោះថា “vivo X50” ដែលមានរហូតដល់ទៅបីម៉ូដែលគឺ vivo X50, X50 Pro និង X50 Pro+។ ស្មាតហ្វូនជំនាន់ថ្មីទាំងបីម៉ូដែលនេះត្រូវបានក្រុមហ៊ុនធ្វើការរចនារូបរាងឡើងកាន់តែមានភាពប្រណិតដោយខាងមុខក្រាលដោយបន្ទះអេក្រង់លាតមានគែមកោងធ្លាក់មកក្រោមជាមួយនឹងការរំលេចដោយលេនទំលុះមួយគ្រាប់ បំពាក់ប្រព័ន្ធកាមេរ៉ាក្រោយថ្មីមានលេនចំនួន 4 គ្រាប់ និងទ្រទ្រង់ជាមួយប្រព័ន្ធសេវា 5G ជាដើម។
រូបរាង និងការរចនា
សម្រាប់ការរចនារូបរាងខាងក្រៅនៃស្មាតហ្វូនជំនាន់ថ្មីក្នុងគ្រូសារ X50 ទាំងបីម៉ូដែលនេះគឺពិតជាមានភាពប្រណិតសក្តិសមបំផុតជាផលិតផលទាន់សម័យ។ ផ្ទៃខ្លួនមុខក្រោយរបស់ពូកវាត្រូវបានក្រាលដោយកញ្ចក់ និងខ័ណ្ឌចែកដោយស៊ុមអាលុយមីញ៉ូម។ ផ្ទៃកញ្ចក់ខាងមុខរបស់ពូកវាមានរំលេចដោយប្រជ្រុយមួយគ្រាប់ដែលមានផ្ទុកកាមេរ៉ាសែលហ្វីក្នុងនោះស្ថិតនៅជិតកែងខាងឆ្វេងផ្នែកខាងលើអេក្រង់។ សម្រាប់កម្រាស់របស់ម៉ូដែល X50 Pro និង X50 Pro+ គឺត្រឹមតែ 8.0mm ជាមួយទងន់សរុប 181.5 ក្រាមដូចគ្នា ខណៈម៉ូដែល X50 មានកម្រាស់ 7.5mm ជាមួយទំងន់ 173 ក្រាម។
ចំនុចដ៏ទាក់ទាញនៅលើការរចនារូបរាងខាងក្រៅរបស់ស្មាតហ្វូនជំនាន់ថ្មីទាំងបីនេះគឺត្រង់កញ្ចប់កាមេរ៉ាក្រោយដែលជាការ Design ថ្មីប្លែកដោយម៉ូដែល X50 មានលេនកាមេរ៉ាដាំជាជួយដេញទំលាក់រត់មកក្រោម និង X50 Pro មានលេនកាមេរ៉ាដំរៀបរាងជាអក្សរ A ដោយលេនខាងលើមួយគ្រាប់មានទំហំធំពីគ្រាប់ខាងក្រោមរត់ត្រង់ជាបន្ទាត់ និងមួយគ្រាប់ទៀតស្ថិតនៅពីក្រោមហើយនៅខាងស្តាំគឺមានអំពូលភ្លើង LED មួយខ្សែ ចំនែកឯកាមេរ៉ារបស់ម៉ូដែល X50 Pro+ វិញបីគ្រាប់រៀបជារាងអក្សរ L និងមួយគ្រាប់ទៀតស្ថិតនៅខាងក្រោមដែលជាលេន Periscope។ ស្មាតហ្វូនជំនាន់ថ្មី vivo X50 Series ទាំងបីនាក់បងប្អូននេះប្រើប្រាស់រន្ធដោតសាកថ្មប្រភេទ USB-C ប៉ុន្តែមិនមានរន្ធដោតកាស 3.5mm និងមិនមានកន្លែងដាក់បន្ថែមទំហំផ្ទុកពីក្រៅទេ។ vivo X50 កើតមកមានបីគឺ Black, Blue, Pink រីឯម៉ូដែល X50 Pro មានពីរពណ៌គឺ Dark Blue និង Light Blue ខណៈម៉ូដែល X50 Pro+ មានពីរពណ៌ដូចគ្នាដែលប៉ុន្តែជាពណ៌ Blue និង Brow។
បន្ទះអេក្រង់លាតស្រឡះរំលេចដោយប្រជ្រុយមួយគ្រាប់
ងាកមកផ្ទៃបង្ហាញខាងមុខវិញបងប្អូន X50 ទាំងបីម៉ូដែលនេះគឺពាក់ដោយបន្ទះបង្ហាញ AMOLED ទំហំ 6.56 អ៊ីងដែលទ្រទ្រង់កម្រិតបង្ហាញត្រឹម Full-HD+ ក្នុងទំហំ 1080x2376 px និងទ្រទ្រង់នៅបច្ចេកវិទ្យាបង្ហាញ HDR10+, មានកម្រិតពន្លឺឡើងដល់ 1,300nits និងភ្ជាប់នូវបច្ចេកវិទ្យាចាក់ពណ៌ DCI-P3 ដូចគ្នា។ ប៉ុន្តែសម្រាប់ផ្ទៃអេក្រង់របស់ម៉ូដែល X50 មិនកោងធ្លាក់គែមសងខាងដូចអេក្រង់របស់ម៉ូដែល X50 Pro និង X50 Pro+ នោះទេ។ ហើយសម្រាប់ល្បឿន refresh rate អេក្រង់របស់ X50 និង X50 Pro គឺមានកម្រិត 90Hz ជាមួយសំពាធសំគាល់ 180Hz ខណៈដែលអេក្រង់របស់ម៉ូដែល X50 Pro+ មានកម្រិត Refresh rate 120Hz ជាមួយសំពាធសំគាល់ 240Hz។ ជាមួយគ្នានេះដែលអេក្រង់របស់ពួកវាក៏មានភ្ជាប់នូវបច្ចេកវិទ្យាការពារភ្នែកផងដែរដូចជា Eagle Eyes Mode និង LTM Sunlight Screen ជាដើម។
កំលាំងម៉ាស៊ីន និងទំហំថ្ម
ទៅលើកំលាំងម៉ាស៊ីនវិញគឺម៉ូដែល X50 និង X50 Pro បានដំឡើងមកជាមួយនឹងបន្ទះឈីប Qualcomm Snapdragon 765G-7nm មានរ៉េមទំហំ 8GB ប្រភេទ LPDRR4X អង្គក្រាហ្វិច Adreno 620 និងមានអង្គផ្ទុកទិន្នន័យស្រាប់ក្នុងម៉ាស៊ីនទំហំ 128GB ទៅ 256GB ជាប្រភេទ UFS2.1។ ចំណែកកំលាំងម៉ាស៊ីនរបស់ម៉ូដែល X50 Pro+ វិញត្រូវបានដំឡើងមកជាមួយកំពូលឈីប Qualcomm Snapdragon 865-7nm+ ភ្ជាប់ដោយម៉ូឌឹមសេវា X55 សម្រាប់ប្រព័ន្ធ 5G, មានរ៉េមទំហំ 8GB ដល់ 12GB ប្រភេទ LPDDR5 ជាមួយអង្គផ្ទុកទិន្នន័យស្រាប់ចាប់ពី 128GB ដល់ 512GB ប្រភេទ USF3.1។ ស្មាតហ្វូនបងប្អូនរួមជំនាន់ទាំងបីម៉ូដែលនេះប្រតិបត្តិការដោយ Android 10 និងស្រោបដោយផ្ទៃមុខកម្មវិធី Funtouch10.5។ ពួកវាមានភ្ជាប់មកជាមួយបច្ចេកវិទ្យា NFC, Bluetooth 5.1, Wi-Fi6 និងបច្ចេកវិទ្យាសុវត្ថិភាពដោយការស្កែនក្រយ៉ៅម្រាមដៃលើអេក្រង់ផ្ទាល់។ សម្រាប់ថ្មរបស់ពួកវិញគឺម៉ូដែល X50 មានថ្មទំហំ 4200mAh និងម៉ូដែល X50 Pro មានថ្មទំហំ 4315mAh ហើយទ្រទ្រង់បច្ចេកវិទ្យាសាកភ្លើងចូលល្បឿនលឿនកំលាំង 33W ដូចគ្នា រីឯម៉ូដែល X50 Pro+ មានថ្មទំហំ 4350mAh ជាមួយបច្ចេកវិទ្យាសាកភ្លើងចូលល្បឿនលឿនកំលាំង 44W។
ប្រព័ន្ធកាមេរ៉ាថតរូប និងវីដេអូ
ចំពោះប្រព័ន្ធកាមេរ៉ាថតរូប និងវីដេអូដែល vivo បានដំឡើងមកនៅលើស្មាតហ្វូនជំនាន់ថ្មីគ្រួសារ X50 នេះគឺពួកវាមានកាមេរ៉ាមុខមួយគ្រាប់ជាលេនទំលុះអេក្រង់សម្រាប់ធ្វើការសែលហ្វីដែលមានទំហំធំដល់ទៅ 32MP ខ្នាត 26mm ជាមួយកម្រិត Aperture f/2.5 ដូចគ្នា។ ដោយឡែកសម្រាប់ប្រព័ន្ធកាមេរ៉ាក្រោយរបស់ពួកវាវិញគឺមាន 4 គ្រាប់ដូចគ្នាប៉ុន្តែទំហំ និងសមត្ថភាពប្រើការខុសគ្នាបន្តិច។
-ប្រព័ន្ធកាមេរ៉ាក្រោយរបស់ម៉ូដែល X50
ប្រព័ន្ធកាមេរ៉ាខាងក្រោយរបស់ X50 មាន 4 គ្រាប់ដាំជាជួរបញ្ឈរដេញចុះក្រោមដោយមានលេនគោលទំហំ 48MP មាន Aperture F/1.6 ប្រើប្រាស់សែនស័រ SONY IMX598 ភ្ជាប់នូវមុខងារ OIS+ លែនទូលាយ Ultra Wide ទំហំ 8.0MP មាន Aperture F/2.2 អាចផលិតរូបភាពប្លង់ទូលាយបានកម្រិតមុំ 120 ដឺក្រេ+ លែន Telephoto ឬ Portrait ទំហំ 13MP មានលទ្ធភាពពង្រីកប្លង់ថតបាន 2x បែប Optical Zoom និងគ្រាប់ចុងក្រោយមានទំហំ 5.0MP ជា Macro Camera ប្រើសម្រាប់ថតវត្ថុនៅជិតបំផុត។
-ប្រព័ន្ធកាមេរ៉ាក្រោយរបស់ X50 Pro
ប្រព័ន្ធកាមេរ៉ាក្រោយរបស់ម៉ូដែលនេះគឺមាន 4 គ្រាប់ដោយ បីគ្រាប់ដាំជារាងអក្សរ A និងមួយគ្រាប់ស្ថិតនៅដាច់ខាងក្រោម។ ដោយលែនទាំង 4 គ្រាប់នេះមានលែនផលិតរូបភាពគោលទំហំ 48MP មាន Aperture F/1.6 ប្រើប្រាស់សែនស័រ SONY IMX598 ភ្ជាប់នូវមុខងារ Gimbal OIS + លែនទូលាយ Ultra wide ទំហំ 8.0MP អាចផលិតរូបភាពប្លង់ទូលាយបានកម្រិតមុំ 120 ដឺក្រេ + លែន Periscope ទំហំ 8.0MP ខ្នាត 135mm មាន Aperture F/3.4 មានលទ្ធភាពពង្រីកប្លង់ថតបាន 5x បែប Optical Zoom និង Digital Zoom បាន 60 តង់មានភ្ជាប់មុខងារ OIS និងលែន Portrait សម្រាប់ផលិតប្លង់ព្រាលផ្ទៃខាងក្រោយវត្ថុទំហំ 13MP ខ្នាត 50mm មាន Aperture F/2.5 ។
-ប្រព័ន្ធកាមេរ៉ាក្រោយរបស់ X50 Pro+
សម្រាប់ប្រព័ន្ធកាមេរ៉ារបស់ X50 Pro+ វិញគឺមាន 4 គ្រាប់ដូចគ្នាដោយ 3 គ្រាប់ដាំជារាងអក្សរ L និងមួយគ្រាប់ជាលេន Periscope ស្ថិតនៅដាច់ខាងក្រោមគេ។ កាមេរ៉ារបស់វាប្រើប្រាស់សែនស័រទំហំ 50MP មាន Aperture F/1.9 ប្រើប្រាស់សែនស័រផលិតរូបភាព ISOCELL GN1 របស់ Samsung ខ្នាត 1/1.31" ភ្ជាប់នូវមុខងារ Dual Pixel PDAF និង Gimbal OIS។ ចំនែកលែន Periscope វិញមានទំហំ 8.0MP ខ្នាត 135mm មាន Aperture F/3.4 មានលទ្ធភាពពង្រីកប្លង់ថតបាន 5x បែប Optical Zoom និង Digital Zoom បាន 60 តង់មានភ្ជាប់មុខងារ OIS + លែន Portrait សម្រាប់ផលិតប្លង់ព្រាលផ្ទៃខាងក្រោយវត្ថុទំហំ 13MP ខ្នាត 50mm មាន Aperture F/2.5 និងមួយគ្រាប់ទៀតជាលែនទូលាយ Ultra wide ទំហំ 8.0MP មាន Aperture F/2.2 អាចផលិតរូបភាពប្លង់ទូលាយបានកម្រិតមុំ 120 ដឺក្រេ ។ សម្រាប់សមត្ថភាពផលិតសាច់វីដេអូវិញកាមេរ៉ារបស់ពូកវាអាចធ្វើបានដល់កម្រិត 4K ក្នុងល្បឿន 30fps មិនដល់ 8K នោះទេ។
កាលបរិច្ឆេទចេញលក់ និងតម្លៃ
-ម៉ូដែល vivo X50
មានតម្លៃខ្ទង់ $490 សម្រាប់ម៉ូដែលពាក់រ៉េមទំហំ 8GB ជាមួយអង្គផ្ទុកទិន្នន័យ 128GB និងខ្ទង់ $550 សម្រាប់ម៉ូដែលពាក់រ៉េមទំហំ 8GB ជាមួយអង្គផ្ទុកទិន្នន័យ 256GB។ ហើយម៉ូដែលនេះនឹងត្រូវចេញដាក់លក់ចាប់ពីថ្ងៃទី 06 ខែមិថុនានេះទៅ។
-ម៉ូដែល vivo X50 Pro
មានតម្លៃខ្ទង់ $600 សម្រាប់ម៉ូដែលពាក់រ៉េមទំហំ 8GB ជាមួយអង្គផ្ទុកទិន្នន័យ 128GB និងខ្ទង់ $660 សម្រាប់ម៉ូដែលពាក់រ៉េមទំហំ 8GB ជាមួយអង្គផ្ទុកទិន្នន័យ 256GB។ ហើយម៉ូដែលនេះនឹងត្រូវចេញដាក់លក់ចាប់ពីថ្ងៃទី 12 ខែមិថុនានេះទៅ។
-ម៉ូដែល vivo X50 Pro+
មានតម្លៃខ្ទង់ $840 សម្រាប់ម៉ូដែលពាក់រ៉េមទំហំ 12GB ជាមួយអង្គផ្ទុកទិន្នន័យ 256GB, ខ្ទង់ $700 សម្រាប់ម៉ូដែលពាក់រ៉េមទំហំ 8GB ជាមួយអង្គផ្ទុកទិន្នន័យ 128GB និង, ខ្ទង់ $770 សម្រាប់ម៉ូដែលពាក់រ៉េមទំហំ 8GB ជាមួយអង្គផ្ទុកទិន្នន័យ 256GB។ ហើយម៉ូដែលនេះនឹងត្រូវចេញដាក់លក់នៅដើមខែកក្តដា៕