ស្មាតហ្វូន LG Velvet នឹងបង្ហាញខ្លួននៅក្នុងទ្វីបអ៊ឺរ៉ុបនៅក្នុងពេលឆាប់ៗនេះ។ ថ្មីៗនេះស្មាតហ្វូនជំនាន់ថ្មីនេះ គឺមានការបង្ហាញខ្លួន នៅលើវេបសាយផ្លូវការរបស់អ៊ីតាលីរបស់ក្រុមហ៊ុន LG ហើយគេរំពឹងថា វានឹងប្រកាសបង្ហាញខ្លួននៅក្នុងខែមិថុនា ឆ្នាំ 2020 នេះហើយ។ ស្មាតហ្វូននេះ គឺជាម៉ូឌែលចុងក្រោយបំផុតរបស់ក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូង។
LG Velvet គឺជាស្មាតហ្វូនថ្នាក់កណ្តាលដែលប្រើប្រាស់នូវបន្ទះឈីប Snapdragon 765G របស់ក្រុមហ៊ុន Qualcomm ដែលបានបង្ហាញខ្លួនកាលពីប៉ុន្មានសប្តាហ៍មុននេះ ប៉ុន្តែក្រុមហ៊ុននេះ នៅមិនទាន់បង្ហាញអំពីព័ត៌មានលម្អិតនៃការដាក់លក់ស្មាតហ្វូននេះ នៅក្រៅទីផ្សាររបស់ប្រទេសកូរ៉េខាងត្បូងនោះទេ។ ប៉ុន្តែពេលនេះ នៅលើបញ្ជីផ្លូវការនេះ គឺមានការទម្លាយថា ស្មាតហ្វូននេះ នឹងបង្ហាញខ្លួននៅក្នុងខែមិថុនា ឆ្នាំ 2020 នេះ។ បន្ថែមពីនេះទៀតនោះ ស្មាតហ្វូននេះ ត្រូវបានគេដឹងថា នឹងមានច្រើនពណ៌សម្រាប់ទីផ្សារអ៊ឺរ៉ុបនោះគឺ Sunset, Aurora White, Aurora Gray និង Aurora Green ។
នៅក្នុងខណៈពេលនេះ បញ្ជីស្រដៀងគ្នាមួយនៅក្នុងប្រទេសអេស្ប៉ាញ និងបារាំង មិនបានទម្លាយនូវអ្វីដែលច្រើននោះទេ។ របាយការណ៍ជាច្រើនចេញពីប្រទេសកូរ៉េខាងត្បូង បានអះអាងថា ស្មាតហ្វូន LG Velvet មាចនឹងបង្ហាញខ្លួននៅក្នុងសហរដ្ឋអាមេរិកនៅក្នុងពេលឆាប់ៗនេះ។ សម្រាប់លក្ខណៈសម្បត្តិជាក់លាក់ និងកាលបរិច្ឆេទនៃការដាក់លក់នៅមិនទាន់ដឹងនៅឡើយទេ៕