ថ្មីៗនេះ មានការរំពឹងជាច្រើនដែលថា ភាពជាដៃគូររបស់ក្រុមហ៊ុន OnePlus ជាមួយនឹងក្រុមហ៊ុន McLaren ប្រហែលជាអាចស្ថិតនៅក្នុងដំណាក់កាលនៃចុងបញ្ចប់ហើយសម្រាប់ក្រុមហ៊ុនផលិតស្មាតហ្វូនថ្នាក់ប្រណិតនេះ ដែលមានការដកចេញពីបញ្ជីនៃភាពជាដៃគូ F1 2020 នៅក្នុងវេបសាយ McLaren។ តាមការបញ្ជាក់របស់ Android Authority ដែលទទួលបាននូវការបញ្ជាក់ជាផ្លូវការចេញពីក្រុមហ៊ុនរថយន្តស្ព័ររបស់អង់គ្លេសនេះថា ខ្លួនលែងជាដៃគូសហការជាមួយនឹងក្រុមហ៊ុន OnePlus ទៀតហើយ។
Android Authority ដកស្រង់សម្តីរបស់អ្នកនាំពាក្យរបស់ក្រុមហ៊ុន McLaren បានបង្ហើបនៅក្នុងអ៊ីម៉ែលថា ភាពជាដៃគូរបស់ក្រុមហ៊ុននេះបានឈានដល់ទីបញ្ជប់ហើយ។ នេះ គឺមានការបង្ហាញយ៉ាងច្បាស់ថា វាមិនទាន់មានអ្វីដែលលាយលក្ខណ៍ជាអក្សរនៅឡើយទេ។ ក្រុមហ៊ុន OnePlus បានបង្ហាញនូវភាពជាដៃគូជាមួយនឹងក្រុមហ៊ុន McLaren នៅក្នុងខែវិច្ឆិកា ឆ្នាំ 2018។ ផលិតផលដំបូងបំផុតដែលបង្ហាញវត្តមាននៅលើទីផ្សារនៅក្នុងកិច្ចសហការនេះ នោះ គឺរថយន្ត OnePus 6T McLaren Edition ។
កាលពីឆ្នាំមុននេះ ក្រុមហ៊ុន OnePlus ក៏ប្រកាសបង្ហាញនូវស្មាតហ្វូន McLaren edition សម្រាប់ម៉ូឌែល OnePlus 7T Pro ផងដែរ។ ក្រុមហ៊ុនបច្ចេកវិទ្យានេះក៏ប្រកាសបង្ហាញនូវស្មាតហ្វូន OP7T Pro 5G McLaren Edition ដែលដាក់លក់ផ្តាច់មុខនៅលើ T-Mobile ។ ស្មាតហ្វូនម៉ូឌែលពិសេស McLaren special editions របស់ក្រុមហ៊ុន OnePlus ត្រូវគេស្គាល់ថាមានការឌីស្សាញដែលមានលក្ខណៈផ្តាច់មុខប្លែកមែនទែន។ ខណៈពេលដែលអ្នកគាំទ្រជាច្រើនរំពឹងស្មាតហ្វូន McLaren edition សម្រាប់ម៉ូឌែល OnePlus 8 series ខាងមុខនោះ វាប្រហែលជាមិនកើតឡើងនោះទេសម្រាប់ម៉ូឌែលទាំងពីរនេះ៕
