ក្រុមហ៊ុន Honor ទើបតែបង្ហាញនូវវត្តមានរបស់ស្មាតហ្វូន Honor Play4T និង Honor Play4T Pro នៅក្នុងខែមេសាកន្លងទៅ។ ពេលនេះ ក្រុមហ៊ុនបច្ចេកវិទ្យានេះ ក៏ប្រកាសត្រៀមខ្លួនក្នុងការបង្ហាញនូវស្មាតហ្វូនមួយទៀតនោះគឺ Honor Play4 5G និង Honor Play4 Pro 5G នៅថ្ងៃទី 3 ខែមិថុនាខាងមុខនេះ។ រូបភាពជាច្រើនសន្លឹករបស់ស្មាតហ្វូន Play4 Pro បង្ហាញខ្លួននៅក្នុងការបែកធ្លាយជាច្រើន ហើយវាមានការជឿជាក់ថា សម្រាប់ស្មាតហ្វូនដែលមានលេខម៉ូឌែល TNNH-AN00 5G ដែលទើបតែបង្ហាញវត្តមាននៅលើ TENAA នោះគឺជាស្មាតហ្វូន Play4។
កាលពីម្សិលមិញនេះ ប្រធានផ្នែកគ្រប់គ្រងផលិតផល Honor Play series លោក Wei Xiaolong Raul បានបង្ហោះនៅលើWeibo ដើម្បីធ្វើការចែករំលែកនូវរូបភាពរបស់ស្មាតហ្វូន Play4 ផងដែរ។ រូបភាពខាងក្រោយរបស់ស្មាតហ្វូន Play4 នេះគឺស៊ីគ្នាទៅនឹងរូបភាពរបស់ស្មាតហ្វូន TNNH-AN00 5G ។ វាមានការបង្ហាញថា ស្មាតហ្វូន TNNH-AN00 នេះនឹងជាស្មាតហ្វូន Honor Play4 5G ។ នៅក្នុងរូបភាពដែលមានការចែករំលែកដោយ Raul នោះ ស្មាតហ្វូន Honor Play4 5G នេះគឺមាន 3 ពណ៌សម្រាប់ធ្វើការជ្រើសរើសនោះគឺពណ៌ខ្មៅ ខៀវ និងស។ គាត់មិនចែករំលែកនូវលក្ខណៈសម្បត្តិលម្អិតរបស់ស្មាតហ្វូននេះនៅឡើយទេ។
កាមេរ៉ាគោលខាងក្រោយរបស់ស្មាតហ្វូននេះគឺមានទំហំ 64-megapixel ស្ថិតនៅគែមផ្នែកខាងឆ្វេងរបស់ស្មាតហ្វូននេះ។ វាក៏មានប្រព័ន្ធស្កេនក្រយ៉ៅដៃផងដែរ។ស្មាតហ្វូន Honor Play4 5G នេះ គឺមានអេក្រង់ទំហំ 6.81-inch IPS LCD ដែលមានកម្រិតភាពច្បាស់ Full HD+ កម្រិត1080 x 2400 pixels ។ អេក្រង់របស់ស្មាតហ្វូននេះគឺមានរន្ធប្រហោង punch-hole ទំហំ 16-megapixel selfie ។ កាមេរ៉ាខាងក្រោយរបស់ស្មាតហ្វូននេះគឺមាន 4 គ្រាប់ដែលមានទំហំ 8-megapixel lens និង2-megapixel sensors ចំនួន 2 គ្រាប់ និងកាមេរ៉ាគោលទំហំ 64-megapixel ផងដែរ។
ស្មាតហ្វូននេះប្រើប្រាស់នូវបន្ទះឈីប octa-core processor 2.0GHz នឹងមានរ៉េមទំហំ 4GB, 6GB និង 8GB ហើយនិងមានម៉េមូរីទំហំ 64GB, 128GB និង 256GB នៅក្នុងប្រទេសចិន។ ស្មាតហ្វូននេះមានថាមពលថ្មទំហំ 4,200mAh ជាមួយនឹងបច្ចេកវិទ្យា fast charging ផងដែរ។ ស្មាតហ្វូននេះដំណើរការនូវ Android 10 OS និង Magic UI ថែមទៀត៕