ប្រទេសឥណ្ឌានៅតែជាទីផ្សារស្មាតហ្វូនធំលំដាប់ទី 2 នៅលើពិភពលោក។ អ្វីដែលគួរឱ្យចាប់អារម្មណ៍ជាងនេះទៀតនោះគឺថា ប្រទេសនេះអាចគ្រប់គ្រងការធ្លាក់ចុះនៃការលក់ស្មាតហ្វូនក្នុងរយៈពេលប៉ុន្មានឆ្នាំកន្លងមកនេះបានយ៉ាងល្អ។ ប្រទេសឥណ្ឌាកំពុងប្រឈមនឹងបញ្ហាប្រឈមធំមួយរបស់ខ្លួននៅឆ្នាំនេះដោយសារការរីករាលដាលនៃជំងឺរាតត្បាតកូវីដ ១៩ ។ ឥឡូវនេះប្រទេសនេះកំពុងបង្កើនកិច្ចខិតខំប្រឹងប្រែងរបស់ខ្លួនក្នុងការលើកទឹកចិត្តដល់ក្រុមហ៊ុនផលិតស្មាតហ្វូនជាច្រើនដើម្បីពង្រីកផលិតកម្មក្នុងស្រុក។
កាលពីថ្ងៃទី 29 ខែឧសភានេះ មានការលុបចោលនូវកម្មវិធី Production Linked Incentive Scheme (PLI) របស់ប្រទេសនេះ ដែលជាកម្មវិធីជួបជុំគ្នា ដើម្បីពិភាក្សាការផ្លាស់ប្តូរនូវរឿងសំខាន់ៗមួយចំនួននៅក្នុងទីផ្សារ។ កិច្ចខិតខំប្រឹងប្រែងនេះ គឺមានគោលបំណងយ៉ាងច្បាស់ក្នុងការនាំវិនិយោគទុនអាមេរិកបន្ថែមទៀត ជាពិសេសធ្វើឱ្យប្រទេសឥណ្ឌាកាន់ តែមានភាពទាក់ទាញក្នុងនាមជាដៃគូនៅក្នុងអ្វីដែលហៅថា“យុទ្ធសាស្ត្រចិនបូកមួយ” ។ ក្រុមហ៊ុនជាច្រើនកំពុងព្យាយាមចាកចេញពីប្រទេសចិនក្នុងរយៈពេលប៉ុន្មានខែថ្មីៗនេះ ចាប់តាំងពីប្រទេសនេះកំពុងធ្វើឱ្យកម្លាំងពលកម្មរបស់ខ្លួនមានតម្លៃថ្លៃជាងមុន។
ក្រុមហ៊ុនផលិតស្មាតហ្វូនជាច្រើនកំពុងផ្លាស់ប្តូរផ្នែកនៃផលិតកម្មទៅកាន់ប្រទេសអាស៊ី ដែលមានការប្រកួតប្រជែងកាន់តែច្រើនដូចជាប្រទេស កម្ពុជា វៀតណាម និងថៃ។ នោះ គឺជាផ្នែក "បូកមួយ" នៅក្នុងការរៀបចំរោងចក្រផ្នែកផលិតកម្មរបស់ចិនដែលមានជាយូរមកហើយ។ សង្គ្រាមពាណិជ្ជកម្មប្រាកដជាមូលហេតុមួយដែលនាំឱ្យមានការផ្លាស់ប្តូរទីផ្សារនាពេលថ្មីៗនេះ។ គណៈកម្មាធិការផ្តល់សិទ្ធិអំណាចបានបោះឆ្នោតសម្រាប់ការដកចេញនូវវិធានមួយដែលវាយតម្លៃរោងចក្រនិងគ្រឿងម៉ាស៊ីន ដែលបាននាំចូលមកក្នុងប្រទេសដោយកំណត់ត្រឹមតែ 40 ភាគរយនៃតម្លៃរបស់វា។
សម្រាប់កម្មវិធីការលើកទឹកចិត្ត (PLI) ផ្សេងទៀតរបស់រដ្ឋាភិបាល ក៏ត្រូវបានផ្លាស់ប្តូរផងដែរ។ ម៉្យាងវិញទៀតគណៈកម្មាធិការក៏បានធ្វើការកែតម្រូវខ្លះៗ លើគោលការណ៍មួយចំនួនរបស់ PLI ផងដែរ ដោយបន្ថយចំនួនព័ត៌មានអាជីវកម្មច្រើន ពេកដែលអ្នកទទួលផលត្រូវផ្ញើទៅរដ្ឋាភិបាល។ វាក៏បានផ្លាស់ប្តូរវិធានមួយចំនួនរបស់អ្នកវិនិយោគិនផងដែរ។ បច្ចុប្បន្ននេះ PLI គឺបានលើកទឹកចិត្តប្រហែល 4% ទៅ 6% ទៅលើការលក់កើនឡើងនៃការផលិតទំនិញនៅក្នុងប្រទេសឥណ្ឌា។ វារួមមានគោលដៅសម្រាប់ក្រុមហ៊ុនដែលមានសិទ្ធិគ្រប់គ្រាន់សម្រាប់រយៈពេលប្រាំឆ្នាំ។
ប្រសិនបើក្រុមហ៊ុនចង់ទទួលបានអត្ថប្រយោជន៍ពីការលើកទឹកចិត្តនោះ ក្រុមហ៊ុនទាំងនោះ ចាំបាច់ត្រូវផលិតស្មាតហ្វូនលំដាប់ប្រណិត (High-End)។ នៅក្នុងឆ្នាំដំបូងនេះ វាចាំបាច់ត្រូវមានទឹកប្រាក់លើសពី INR 4,000 crore។ សម្រាប់លើកទី 2 គឺ INR 8,000 crore, 15,000 crore, 20,000 crore និង 25,000 crore សំរាប់រយៈពេល 4 ឆ្នាំខាងមុខទៀត។ ប្រសិនបើអ្នកមិនដឹងទេនោះ 1 Crore ស្មើនឹង ININ 10,000,000 ដែលមានតំលៃប្រហែល 132,409 ដុល្លារអាមេរិក។
ក្រុមហ៊ុនមួយក្នុងចំណោមក្រុមហ៊ុន ដំបូងគេដែលទទួលបានអត្ថប្រយោជន៍ពីលក្ខខណ្ឌ PLI ថ្មីអាចជាក្រុមហ៊ុន Apple ។ កាតាលីករសំខាន់មួយនៃវិធានថ្មីនេះគឺកំពុងចរចាជាមួយក្រុមហ៊ុនបច្ចេកវិទ្យា Apple ។ បច្ចុប្បន្ននេះ មានក្រុមហ៊ុនផលិតដែលជាប់កិច្ចសន្យារបស់ខ្លួន គឺក្រុមហ៊ុន Wistron និង Foxconn ដែលផ្លាស់ប្តូរផលិតកម្ម iPhone ទៅកាន់ប្រទេសឥណ្ឌាផងដែរ។ ស្ថានភាពដូចគ្នាក៏ប្រហែលជាអនុវត្តចំពោះក្រុមហ៊ុន Pegatron ដែលជាដៃគូទី 3 របស់ Apple។ ក្រុមហ៊ុនផលិតទូរស័ព្ទ iPhone នេះប្រហែលជាផ្នែកមួយដ៏សំខាន់ក្នុងការពង្រឹងយុទ្ធសាស្ត្រថ្មីរបស់ប្រទេសឥណ្ឌានេះ៕
