កាលពីខែមុននេះ ក្រុមហ៊ុន OPPO បានប្រកាសបង្ហាញនូវវត្តមានរបស់ស្មាតហ្វូន Reno 4 និង Reno 4 Pro នៅក្នុងប្រទេសចិន ជាមួយនឹងបន្ទះឈីប Snapdragon 765G ដែលមានការទ្រទ្រង់ទៅលើបច្ចេកវិទ្យា 5G ផងដែរ។ ស្មាតហ្វូនទាំងនេះ ដំណើរការនូវ ColorOS 7.2 Android 10។ ពេលនេះ ក្រុមហ៊ុនបច្ចេកវិទ្យានេះ ក៏ត្រៀមនាំយកនូវ version មួយទៀតរបស់ប្រភេទ Pro នៅក្នុងទីផ្សាររបស់សកលផងដែរ ពិសេសគឺនៅក្នុងប្រទេសឥណ្ឌានេះ។
គួរបញ្ជាក់ថា ក្រុមហ៊ុន OPPO បានបង្ហាញនូវស្មាតហ្វូន Reno 3 Pro នៅក្នុងខែធ្នូ ឆ្នាំ 2019 ហើយនេះ គឺជាស្មាតហ្វូនមួយដែលជាប្រភេទ 5G ។ ប៉ុន្តែខុសប្លែកពីស្មាតហ្វូន Redmi K30 5G ដែលបង្ហាញខ្លួននៅក្នុងដូចគ្នាដែរនោះ ស្មាតហ្វូនរបស់ OPPO នេះគឺមានការឌីស្សាញរូបរាងស្រស់ស្អាតជាង និងមុខងារច្រើនជាងផងដែរ។ នៅក្នុងខែមីនានេះ ក្រុមហ៊ុននេះ ក៏ បង្ហាញនូវស្មាតហ្វូនថ្មីរបស់ខ្លួនសម្រាប់ទីផ្សារសកលផងដែរ ប៉ុន្តែវាមិនមានបច្ចេកវិទ្យា 5G នោះទេ។ ស្មាតហ្វូននេះ ដាក់លក់ជាមួយនឹងបន្ទះឈីប MediaTek Helio P95។ ស្មាតហ្វូននេះ មានអេក្រង់រាបស្មើជាមួយនឹងកាមេរ៉ា dual punch hole ផងដែរ។
តាមការបញ្ជាក់ចេញពី YouTuber Linus Sebastian ដែលជាស្ថាបនិករបស់ Linus Media Group និងអ្នកទម្លាយព័ត៌មានរបស់ប្រទេសឥណ្ឌា Mukul Sharma ឬ @stufflistings បានបញ្ជាក់ថាក្រុមហ៊ុន OPPO នឹងនាំយកនូវស្មាតហ្វូន Reno 4 Pro ទៅកាន់ទីផ្សាររបស់សកល។ សម្រាប់ស្មាតហ្វូននេះ នឹងបង្ហាញខ្លួននៅក្នុងទីផ្សាររបស់ឥណ្ឌាជាមួយនឹងកម្រិតអេក្រង់ខ្ពស់ដល់ទៅ 120Hz ហើយសម្រាប់ការឌីស្សាញរបស់ស្មាតហ្វូននេះ គឺរក្សារូបរាងដដែល។ យើងអាចរំពឹងថាស្មាតហ្វូននេះនឹងមានការបែកធ្លាយជាច្រើនទៀតមុនការប្រកាសបង្ហាញខ្លួនជាផ្លូវការផងដែរ៕
