បន្ទាប់ពីមានការប្រកួតប្រជែងទៅលើបច្ចេកវិទ្យាបន្ទះឈីប អេក្រង់ និងកាមេរ៉ា គោលដៅចុងក្រោយបំផុតរបស់ក្រុមហ៊ុន Apple គឺការប្រែក្លាយស្មាតហ្វូន iPhone របស់អ្នកសម្រាប់ធ្វើការសម្គាល់ទៅលើអត្តសញ្ញាណរបស់អ្នកតាមរយៈការជំនួសនូវលិខិតឆ្លងដែន ប័ណ្ណបើកបរ និងជាច្រើនទៀត។ នេះគឺជាជំហានមួយទៀតរបស់ក្រុមហ៊ុនបច្ចេកវិទ្យាយក្សនេះ ក្នុងការធ្វើអោយស្មាតហ្វូន iPhone នេះ ក្លាយជាវត្ថុមួយដ៏សំខាន់ដែលគ្រប់គ្នាចង់បាន។
ថ្មីៗនេះ ក្រុមហ៊ុន Apple ក៏បង្ហាញអំពីគម្រោងផែនការរបស់ខ្លួនក្នុងការជំនួសនូវកូនសោររថយន្ត ហើយពេលនេះក្រុមហ៊ុនបច្ចេកវិទ្យានេះ ក៏មានគម្រោងក្នុងការជំនួសនូវលិខិតឆ្លងដែន និងទម្រង់នៃអត្តសញ្ញាណជាច្រើនទៀតផងដែរ។ ស្មាតហ្វូន iPhone នេះគឺមានការជំនួសទៅលើការប្រើប្រាស់នូវ Notepads កាមេរ៉ា ប៊ិច និងវត្ថុជាច្រើនទៀតរួចហើយ។ វាមិនមានអ្វីដែលភ្ញាក់ផ្អើលនោះទេនៅពេលដែលស្មាតហ្វូននេះអាចធ្វើការជំនួសនូវ IDs របស់អ្នកនោះ។
យោងទៅតាមប៉ាតង់ជាច្រើន ដែលមានចំណងជើងថា “Providing Verified Claims of User Identity” នោះ អត្តសញ្ញាណរបស់អ្នកប្រើប្រាស់អាចត្រូវបានគេថតទុក ឬត្រូវបានបញ្ចូនបន្ត។ នៅក្នុងប៉ាតង់នេះគឺធ្វើការពណ៌នាលម្អិតទៅលើប្រព័ន្ធមួយដែលរក្សាទុកនូវអត្តសញ្ញាណនៅលើស្មាតហ្វូនរបស់អ្នក។
