នៅក្នុងប៉ុន្មានឆ្នាំនេះ ក្រុមហ៊ុនផលិតស្មាតហ្វូនជាច្រើន បាននឹងកំពុងតែព្យាយាមក្នុងការផលិតនូវស្មាតហ្វូន ដែលមានអេក្រង់ពេញគែម និងការប្រើប្រាស់នូវកាមេរ៉ា Punch-Hole រួមជាមួយនឹងកាមេរ៉ាផុសឡើង ឬអេក្រង់ដំណក់ទឹក Waterdrop Notch ។ ថ្មីៗនេះ បច្ចេកវិទ្យាកាមេរ៉ាខាងក្រោមអេក្រង់នេះ គឺមានការកើនឡើង ហើយពេលនេះ ក្រុមហ៊ុន Visionox បានបញ្ជាក់ថា អេក្រង់ OLED របស់ខ្លួនដែលមានបំពាក់នូវបច្ចេកវិទ្យានេះគឺធ្វើការផលិតទ្រង់ទ្រាយធំហើយ។
ក្រុមហ៊ុនបច្ចេកវិទ្យានេះ បាននិយាយថា ដំណោះស្រាយទៅលើកាមេរ៉ាក្រោមអេក្រង់នេះ គឺរួចរាល់ហើយ ហើយក្រុមហ៊ុននេះគឺជាក្រុមហ៊ុន មួយដែលសម្រេចបាននូវលទ្ធផលដ៏ល្អនេះ។ ក្រុមហ៊ុន Visionox ក៏ប្រើប្រាស់នូវអេក្រង់ OLED សម្រាប់ស្មាតហ្វូននេះ។ បច្ចេកវិទ្យានេះ អាចអនុញ្ញាតអោយក្រុមហ៊ុនផលិតស្មាតហ្វូនជាច្រើន អាចប្រើប្រាស់នូវអេក្រង់ពេញគែម ហើយវាក៏ក្លាយជាដំណោះស្រាយនៃបច្ចេកវិទ្យាកាមេរ៉ាខាងក្រោមអេក្រង់ដំបូងបំផុតរបស់ពិភពលោក ដែលអាចធ្វើការផលិតទ្រង់ ទ្រាយធំផងដែរ។
បើទោះបីជាក្រុមហ៊ុនផលិតស្មាតហ្វូនជាច្រើន បានបង្ហាញនូវបច្ចេកវិទ្យាកាមេរ៉ាខាងក្រោម អេក្រង់របស់ខ្លួន ក៏ដោយនោះ វាមិនទាន់មានស្មាតហ្វូនណាមួយដែលមានបច្ចេកវិទ្យានេះនៅឡើយទេ។ ក្រុមហ៊ុន OPPO បានលើកឡើងថា បច្ចេកវិទ្យានេះនឹងមិនបង្ហាញខ្លួននៅក្នុងឆ្នាំ 2020 នេះទេដោយសារតែវាមានការប៉ះពាល់ទៅលើរូបភាពរបស់វា។ បន្ថែមពីនេះទៀតនោះ វាអាចនឹងមានតម្លៃថ្លៃថែមទៀត។ អ្វីដែលគួរអោយចាប់អារម្មណ៍ទៀតនោះ ស្មាតហ្វូន Mate 40 Series របស់ក្រុមហ៊ុន Huawei មានពាក្យចចាមអារ៉ាមថា នឹងមានបច្ចេកវិទ្យាកាមេរ៉ាថ្មីនេះផងដែរ។ របាយការណ៍ថ្មីៗនេះ បានបញ្ជាក់ថា ស្មាតហ្វូនជាច្រើននាពេលខាងមុខនេះ នឹងប្រើប្រាស់នូវបច្ចេកវិទ្យានេះ ហើយវានឹងដំណើរការបានយ៉ាងល្អមែនទែន៕
