កាលពីខែឧសភាកន្លងទៅនេះ អ្នកទម្លាយព័ត៌មានម្នាក់ បានទម្លាយនូវលក្ខណៈសម្បត្តិជាច្រើនរបស់កុំព្យូទ័រស៊េរីថ្មី Huawei Honor MagicBook ដែលសមាជិកថ្មីនេះ ត្រូវបានគេដឹងថា នឹងប្រើប្រាស់នូវបន្ទះឈីប AMD Ryzen 7 (4800H) ដែលមានភ្ជាប់ជាមួយនឹងព័ត៌មានលម្អិតជាច្រើនទៀតផងដែរ។ តាមការបញ្ជាក់របស់អ្នកប្រើប្រាស់នៅលើ Weibo ម្នាក់ បានបញ្ជាក់ថា កុំព្យូទ័រ Honor MagicBook AMD Ryzen Edition នឹងបង្ហាញខ្លួនជាផ្លូវការនៅថ្ងៃទី 16 ខែកក្កដាខាងមុខនេះហើយ។
អ្នកទម្លាយព័ត៌មានរូបនេះ ក៏បានចែករំលែកនូវរូបភាពរបស់កុំព្យូទ័រថ្មីនេះ ដោយបានបញ្ជាក់ថា សមាជិកថ្មីនេះ នឹងមានមុខងារ “A+ Productivity” ផងដែរ។ សម្រាប់អ្នកប្រើប្រាស់ទូទៅ នៅមិនទាន់ដឹងថា មុខងារនេះ គឺសម្រាប់អ្វីនោះទេ គ្រាន់តែដឹងៗថា វាត្រូវបានគេភ្ជាប់មកសម្រាប់ពង្រឹងទៅលើផ្នែក Hardware របស់កុំព្យូទ័រនេះប៉ុណ្ណោះ។ នៅក្នុងរូបភាពនេះ គឺមានការបង្ហាញអំពីការឌីស្សាញរូបរាងរបស់កុំព្យូទ័រ MagicBook Ryzen edition ផងដែរ។ ម៉ាស៊ីនេះ មានតួខ្លួនស្តើង និងមានការប្រើប្រាស់នូវបន្ទះឈីប Ryzen 4000 Series ដែលធ្លាប់បានប្រើប្រាស់នៅលើកុំព្យូទ័រ Honor MagicBook 14./15 និង MagicBook Pro ផងដែរ។
អ្នកទម្លាយព័ត៌មានដដែលនេះ ក៏មានទម្លាយកាលពីពេលមុននេះថា វាគឺជាបន្ទះឈីប AMD Ryzen 7 4800H។ បន្ទះឈីបនេះគឺនឹងប្រើប្រាស់ជាមួយនឹងរ៉េមទំហំ 16GB ហើយវាក៏នឹងប្រើប្រាស់នូវ Western Digital PC SN720 NVMe SSD ផងដែរ។ សម្រាប់កុំព្យូទ័រ MagicBook នេះ មិនមែនផ្តោតទៅលើការលេងហ្គេមនោះទេ ប៉ុន្តែវានឹងមានការប្រើប្រាស់ជាមួយនឹងមុខងារ Radeon RX Vega GPU ដែលល្អក្នុងការប្រើប្រាស់ផងដែរ។ ក្រុមហ៊ុន Honor ត្រូវបានគេនិយាយថា គួរតែប្រកាសបង្ហាញនូវកុំព្យូទ័រដែលផ្តោតទៅលើការលេងហ្គេមនៅក្នុងសន្និសីទនាពេលខាងមុខនេះផងដែរ៕
