Samsung គឺជាក្រុមហ៊ុនស្មាតហ្វូនដែលគ្រោងដំណែងលេខមួយសម្រាប់ទីផ្សារស្មាតហ្វូនសកលលោកអស់រយះពេលជាច្រើនឆ្នាំកន្លងមកហើយ។ ប៉ុន្តែពេលនេះដំណែងទីផ្សារស្មាតហ្វូនឈានមុខគេបានប្រែប្រួលសម្រាប់ត្រីមាសទីពីរ ឆ្នាំ 2020 នេះ។ បើយោងតាមរបាយការស្រាវជា្រវទីផ្សារស្មាតហ្វូនដែលចេញដោយក្រុមហ៊ុន Canalys បាននិយាយថា “ក្រុមហ៊ុន Huawei ទម្លាក់ក្រុមហ៊ុន Samsung បានក្លាយខ្លួនជាក្រុមហ៊ុនម៉ាកស្មាតហ្វូនដែលឈានមុខគេក្នុងទីផ្សារស្មាតហ្វូនសកលលោកកំឡុងត្រីមាសទីពីរឆ្នាំនេះ” ។
នេះគឺជាការប្រតិបត្តិការដ៏ជោគជ័យបំផុតពីក្រុមហ៊ុន Huawei ដែលបានគ្រងដំណែងជាក្រុមហ៊ុនម៉ាកស្មាតហ្វូននាំមុខគេក្នុងការនាំចេញស្មាតហ្វូនទៅកាន់ទីផ្សារសកលលោកបើទោះបីជាក្រុមហ៊ុនកំពុងស្ថិតក្នុងការហាមឃាត់ពីសហរដ្ឋអាមេរិក ព្រមទាំងប្រឈមនឹងការកើនកំដៅនៅក្នុងទីផ្សារផ្សេងទៀតក៏ដោយ។ នៅក្នុងរបាយការណ៍បានបន្ថែមថាសម្រាប់ខែមេសា និងមិថុនា ឆ្នាំ 2020 ក្រុមហ៊ុន Huawei បាននាំចេញស្មាតហ្វូនរបស់ខ្លួនចូលទៅក្នុងទីផ្សារសកលបានចំនួន 55.8 លានគ្រឿង ខណៈក្រុមហ៊ុន Samsung បាននាំចេញស្មាតហ្វូនរបស់ខ្លួនបានចំនួន 53.7 លានគ្រឿង ដែលនេះអាចសបញ្ជាក់អោយឃើញថា Huawei មានយុទ្ធសាស្ត្រទីផ្សារល្អ ហើយរឹងមាំកម្រិតណា និងពិសេសគឺនៅទីផ្សារក្នុងកំណើតរបស់ខ្លួនផ្ទាល់តែម្តង។
ស្មាតហ្វូនប្រមាណជា 2 ភាគ 3 របស់ក្រុមហ៊ុន Huawei ត្រូវបានដាក់លក់នៅក្នុងទីផ្សារប្រទេសចិន។ ព្រមជាមួយគ្នានេះដែរក្រុមហ៊ុន Huawei រួមជាមួយម៉ាកយីហោរង (Sub-Brand) របស់ខ្លួនគឺ Honor បាននឹងកំពុងគ្រប់គ្រងចំនែកទីផ្សារស្មាតហ្វូនក្នុងប្រទេសចិនស្ទើរតែជិតពាក់កណ្តាលទៅហើយដោយបានក្តោបក្តាប់ចំនែកទីផ្សារសរុបដល់ទៅ 46% ឯណោះ ដែលនេះជាចំនួនច្រើនជាងបើធៀបនឹងក្រុមហ៊ុន vivo, OPPO និង Xiaomi នៅក្នុងទីផ្សារប្រទេសចិន។ ហើយនេះគឺជាចំណែកទីផ្សារខ្ពស់បំផុតសម្រាប់ Huawei ដែលមិនធ្លាប់មាននៅក្នុងទីផ្សារប្រទេសកំណើតរបស់ខ្លួន។ នៅលើទីផ្សារទូទាំងពិភពលោកការលក់ស្មាតហ្វូនរបស់ Huawei បានធ្លាក់ចុះ 5% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដោយឡែកសម្រាប់ក្រុមហ៊ុន Samsung វិញគឺការលក់បានធ្លាក់ចុះចំនួន 30% ក្នុងរយៈពេលដូចគ្នានេះដែរ។
កត្តាដែលធ្វើអោយការលក់មានការថយចុះនេះគឺទំនងជាដោយសារតែតម្រូវការធ្លាក់ចុះនៅក្នុងទីផ្សារដូចជាសហរដ្ឋអាមេរិក អឺរ៉ុប និងប្រេស៊ីលជាដើម។ យ៉ាងណាមិញកាលពីពេលថ្មីៗនេះក្រុមហ៊ុន Huawei បានបង្ហាញថាប្រាក់ចំណូលរបស់ខ្លួននៅឆមាសទីមួយនៃឆ្នាំនេះបានកើនឡើង 13,1% បើប្រៀបធៀបនឹងរយៈពេលដូចគ្នាកាលពីឆ្នាំមុន។ ក្រុមហ៊ុននេះអាចគ្រប់គ្រងទីផ្សារនាំចេញផលិតរបស់ខ្លួនបានល្អទោះបីមានផលប៉ះពាល់ពីការរីករាលដាលដោយជំងឺកូវីដ 19 និងការដាក់ទណ្ឌកម្មពីសហរដ្ឋអាមេរិកក៏ដោយ។ ក្រុមអ្នកវិភាគបានធ្វើការព្យាករណ៍ថាក្រុមហ៊ុន Huawei នឹងនៅតែខ្លាំង និងបន្តគ្រប់គ្រងចំណែកទីផ្សារនាំមុខគេសម្រាប់ត្រីមាសក្រោយទៀត ខណៈក្រុមហ៊ុន Samsung បានត្រៀមបញ្ចេញអាវុធថ្មីៗដែលមានអនុភាពខ្លាំងរបស់ខ្លួននៅប៉ុន្មានថ្ងៃខាងមុខទៀតនេះ ក៏ដូចជាអាវុធធុនកណ្តាលថ្មីៗជាច្រើនទៀតដើម្បីបង្កើនការលក់ និងទាញចំនែកទីផ្សាររបស់ខ្លួនអោយកើនឡើងវិញ។ ដូចនេះចាំមើលថានៅត្រីមាសបន្ទាប់ៗក្នុងឆ្នាំ 2020 នេះតើ Huawei នៅតែខ្លាំង ឬក៏ Samsung អាចវាយដណ្តើមយកដំណែងរបស់ខ្លួនបានមកវិញដែរ ឬទេ៕