យប់មិញនេះ អាចនិយាយបានថា គឺជាព្រឹត្តិការណ៍មួយសម្រាប់ក្រុមហ៊ុន Samsung ដែលបានធ្វើការប្រកាសបង្ហាញខ្លួនជាផ្លូវការនូវវត្តមានរបស់ស្មាតហ្វូន Galaxy Note 20 series, Galaxy Z Fold 2, Galaxy Tab S7 series និង Galaxy Watch 3 នៅក្នុងព្រឹត្តិការណ៍ Galaxy Unpacked នេះ ក្នុងនោះក៏មានវត្តមានរបស់កាសស្តាប់ Galaxy Buds Live TWS ផងដែរ។
កាសស្តាប់នេះ គឺមានតម្លៃ $169/€189 នឹងអាចរកទិញបាននៅក្នុងតំបន់ជាច្រើនចាប់ពីថ្ងៃទី 6 ខែសីហានេះ និងថ្ងៃទី 21 ខែសីហានេះនៅអ៊ឺរ៉ុប។ Galaxy Buds Live គឺជាប្រភេទកាសស្តាប់ TWS ដំបូងបំផុតរបស់ក្រុមហ៊ុន Samsung ដែលមានភ្ជាប់ជាមួយនឹងមុខងារទប់សំឡេងរំខាន ANC (Active Noise Cancellation)។ កាសស្តាប់នេះ គឺមានរូបរាងដូចជាគ្រាប់សណ្តែក មិនហៀរចេញក្រៅត្រចៀកនោះទេ នៅពេលដែលពាក់នៅលើត្រចៀកនោះ។
កាសស្តាប់ទាំងពីរនេះ គឺមានភ្ជាប់ជាមួយនឹង 12mm drivers របស់ AKG, 3 microphones (1 នៅខាងក្នុង និង 2 នៅខាងក្រៅ) និងបំពង់បាស់ផងដែរ។ ក្រុមហ៊ុននេះអះអាងថា ការបញ្ចូលថាមពលថ្មម្តងគឺប្រើប្រាស់បាន 6 ម៉ោង (60mAh សម្រាប់កាសម្ខាង) និង 21 ម៉ោងសម្រាប់ប្រអប់សាកថ្ម (472mAh) តាមរយៈរន្ធ USB Type-C និង Qi wireless charger នេះ។ កាសស្តាប់នេះគឺមានទម្ងន់ 5.6g ខណៈពេលដែលប្រអប់សាកថ្មទទេររបស់វាគឺមានទម្ងន់ 42.2g។ សម្រាប់ប្រអប់កាសនេះគឺមានវិមាត្រ 50.0 x 50.2 x 27.8mm ហើយកាសស្តាប់គឺមានវិមាត្រ 27.2 x 17.3 x 15.5mm ។
កាសស្តាប់នេះភ្ជាប់ទំនាក់ទំនងតាមរយៈប្រព័ន្ធ Bluetooth 5.0 និងទ្រទ្រង់ទៅលើ AAC, SBC និង scalable codec ជាច្រើនថែមទៀត។ កាសនេះ អាចប្រើប្រាស់បានស្ទើរតែគ្រប់ស្មាតហ្វូន ថេប្លេត PCs ទូរទស្សន៍ឆ្លាតវៃ និងឧបករណ៍ជាច្រើនទៀតផងដែរ។ វាក៏មានវិញ្ញាបនបត្រ IPX2 សម្រាប់ការពារការជ្រាបទឹក និងធូលីផងដែរ។
កាសស្តាប់ Galaxy Buds Live នេះមាន 3ពណ៌គឺ Mystic Black, Mystic Bronze និង Mystic White៕