បន្ទាប់ពីការតេស្តថ្មីៗនេះ ក្រុមហ៊ុន Apple ត្រូវបានគេនិយាយថា មិនបានធ្វើការពង្រឹងទៅលើភាពរឹងមាំសម្រាប់ថេប្លេត iPad Pro 2020 របស់ខ្លួននោះទេ បើធៀបជាមួយនឹងម៉ូឌែលជំនាន់មុនៗ។ បើមើលទៅលើការតេស្តភាពរឹងមាំរបស់វាពីសំណាក់ JerryRigEverything បង្ហាញថា ថេប្លេត iPad ថ្មីនេះ គឺពិតជាងាយស្រួលមែនទែនក្នុងការបែកបាក់។
ក្រុមហ៊ុនបច្ចេកវិទ្យាយក្សរបស់អាមេរិកនេះ បានដាក់ដូចជារំលងចោលនូវការពង្រឹងទៅលើគុណភាពនៃភាពរឹងមាំរបស់ថេប្លេតនេះ ជាមួយនឹងវត្តមានរបស់ថេប្លេត iPad Pro 2020 វាគឺនៅតែមានសភាពដូចទៅនឹងថេប្លេតម៉ូឌែលឆ្នាំ 2018 ផងដែរ។ ស្រដៀងគ្នាទៅនឹងថេប្លេត iPad ជំនាន់មុនដែរនោះ សម្រាប់ version ចុងក្រោយនេះ គឺមានចំណុចខ្សោយមួយនោះដែលនៅក្បែរ microphone។ នៅក្នុងការតេស្តទៅលើការបត់នោះ ថេប្លេត iPad Pro 2020 គឺពិតជាងាយស្រួលបែកមែនទែនដូចទៅនឹងម៉ូឌែលជំនាន់មុនរបស់វាផងដែរ។
នៅក្នុងវីដេអូនេះ YouTuber នេះ បានធ្វើការតេស្តទៅលើ Magic Keyboard ផងដែរ ហើយគាត់រកឃើញថា ថេប្លេតនេះ ពិតជាប្រើប្រាស់បានយូរ និងរឹងមាំក្នុងការប្រើប្រាស់។ យ៉ាងណាមិញ សម្រាប់ផ្នែកខាងក្រៅរបស់វាគឺមិនមានការពង្រឹងទៅលើភាពរឹងមាំនោះទេ ប៉ុន្តែលក្ខណៈសម្បត្តិខាងក្នុងរបស់ថេប្លេតនេះគឺមានការពង្រឹងខ្លាំងមែនទែន៕
