ក្រុមហ៊ុន Apple នឹងប្រារព្ធព្រឹតិ្តការណ៍ប្រកាសចេញសមត្ថិផលថ្មីៗរបស់ខ្លួននៅថ្ងៃទី 15 ក្នុងខែកញ្ញាស្អែកនេះ។ ហើយនៅក្នុងព្រឹត្តិការណ៍នោះក្រុមហ៊ុន Apple ត្រូវបានគេរាយការណ៍ថាអាចនឹងបង្ហាញវត្តមានស្មាតហ្វូនជំនាន់ថ្មីគឺ iPhone 12 Series នោះទេ ហើយក្រុមហ៊ុននឹងដាក់បង្ហាញចេញនូវនាឡិកាដៃ Apple Watch និង iPad ជំនាន់ថ្មីជំនួសវិញ។ ទោះជាយ៉ាងមានរបាការណ៍ថ្មីមួយចេញពីប្រទេសចិនដែលមានចុះផ្សាយដោយបណ្តាញក្រុមហ៊ុន Pinduoduo របស់ចិនដែលបានបញ្ជាក់ថាវត្តមាន Apple iPhone 12 Series នឹងមកដល់ក្នុងខែកញ្ញានេះ។
ក្រុមហ៊ុននេះបានប្រកាសបើកទំព័រទទួលស្វាគមន៍សម្រាប់ iPhone 12 Series ផ្លូវការណ៍ហើយដែរ និងបានអះអាងថាការចេញលក់ស្មាតហ្វូនជំនាន់ថ្មីនេះគឺចាប់ផ្តើមពីថ្ងៃទី 16 កញ្ញានេះទៅ។ ប៉ុន្តែទោះជាយ៉ាងណាគេមិនទាន់ជឿជាក់ទៅលើការអះអាងរបស់ក្រុមហ៊ុន Pinduoduo ទាំងស្រុងនោះទេ ហើយគេក៏មិនរំពឹងដែរថា iPhone 12 Series នឹងមានវត្តមាននៅទីផ្សារប្រទេសចិននៅចុងសប្តាហ៍នេះ។ ចំនែកក្រុមហ៊ុន Apple វិញបានចេញសេចក្តីប្រកាសបញ្ជាក់រួចហើយថាវត្តមាន iPhone 12 Series ដែលប្រកាសចេញក្នុងឆ្នាំនេះនឹងត្រូវពន្យាពេលចេញលក់ពីរទៅបីសប្តាហ៍បន្ទាប់ពីថ្ងៃប្រកាសចេញ។ តាមរយះរបាយការណ៍មួយចំនួនបានធ្វើការព្យាករណ៍ថាការចេញលក់ iPhone 12 Series អាចនឹងត្រូវធ្វើឡើងចាប់ពីខែតុលាទៅ។
ចំនែករបាយការណ៍ផ្សេងៗទៀតបានបង្ហើបអោយដឹងថាការបើកអោយធ្វើការបញ្ជាទិញមុន (Pre-booking) សម្រាប់ iPhone 12 Series អាចនឹងត្រូវធ្វើឡើងនៅពាក់កណ្តាលខែតុលា, 2020 ហើយការដឹកជញ្ចូកនឹងចាប់ផ្តើមធ្វើឡើងនៅមួយសប្តាហ៍បន្ទាប់ ប៉ុន្តែមិនមែនចេញលក់គ្រប់ម៉ូដែលនោះទេ។ ដោយនៅក្នុងរបាយការណ៍បានបញ្ជាក់ថា iPhone 12 នឹងអាចរកជាវបាននៅក្នុងខែតុលាខណៈម៉ូដែលផ្សេងទៀតក្នុងជំនាន់របស់វាដូចជា iPhone 12 Pro នឹងត្រូវចេញដាក់លក់នាខែវិច្ឆិកា។
បើតាមប្រភពព័ត៌មានជាច្រើនទៀតបានចុះផ្សាយអោយដឹងថាក្នុងព្រឹត្តិការណ៍ឆ្នាំនេះ Apple នឹងធ្វើការដាក់បង្ហាញចេញផលិតផលថ្មីៗជាច្រើនរួមមាន Apple Watch 6 Series, New iPad 2020, New Apple TV2020, Smaller HomePod, AirTags និងកាស AirPods 2020 ជាដើម ។ ដូចនេះដើម្បីដឹងជាក់ច្បាស់ថាមានផលិតផលថ្មីៗអ្វីខ្លះក្រៅពី iPhone 12 Series ដែលក្រុមហ៊ុន Apple នឹងនាំមកដាក់បង្ហាញនៅថ្ងៃទៅ 15 កញ្ញា ឆ្នាំនេះកុំភ្លេចរងចាំតាមដានទាំងអស់គ្នា៕