អ្នកប្រើប្រាស់នៅលើ Twitter ម្នាក់ដែលប្រើប្រាស់នូវឈ្មោះហៅថា apple_idesigner បានចេញផ្សាយនូវរូបភាពរបស់ស្មាតហ្វូន iPhone 12 Pro ហើយស្មាតហ្វូននេះ នឹងមិនទាន់បង្ហាញខ្លួននៅក្នុងសប្តាហ៍ក្រោយនេះទេ។ រូបភាពនេះ គឺស្របគ្នាទៅនឹងពាក្យចចាមអារ៉ាមជាច្រើន និងការបែកធ្លាយជាច្រើន ហើយវាប្រហែលជាដូចទៅនឹងអ្វីដែលយើងអាចនឹងឃើញនៅក្នុងការប្រកាសបង្ហាញខ្លួននៅក្នុងខែតុលាខាងមុខនេះ។
បើមើលទៅលើ iPhone 12 Pro ថ្មីនេះ គឺមានរូបរាងប្រហាក់ប្រហែលទៅហ្នឹងស្មាតហ្វូនជំនាន់ទី 1 របស់ iPhone 4 ឬ iPhone SE អញ្ចឹង។ ប៉ុន្តែការបែកធ្លាយថ្មីនេះ គឺបានបញ្ជាក់ថា ស្មាតហ្វូនថ្មីនេះ គឺមានប៊ូតុង Home ហើយកាមេរ៉ារបស់វាគឺមានការបន្ថែមនូវសេនស័រជាច្រើនទៀតផងដែររួមជាមួយនឹងភ្លើង Flash ផងដែរ។ ក្រុមហ៊ុន Apple បញ្ជាក់ថា ផលិតផលថ្មីរបស់ខ្លួននឹងបង្ហាញនៅថ្ងៃទី 15 ខែកញ្ញានេះហើយ។ ប៉ុន្តែក្រុមហ៊ុននេះ នៅមិនទាន់ប្រកាសចេញអំពីផលិតផលថ្មីនេះនៅឡើយទេ។ សម្រាប់ផលិតផលថ្មីនៅក្នុងព្រឹត្តិការណ៍នេះ ប្រហែលជាមានដូចជា Apple Watch Series 6 និងនាឡិកាតម្លៃសមរម្យជាច្រើនទៀតដូចជា Watch SE, iPad Air 4 និង iPad 8 ផងដែរ។
នៅសល់តែប៉ុន្មានម៉ោងទៀតប៉ុណ្ណោះ គឺដល់ពេលក្រុមហ៊ុនធ្វើបទបង្ហាញរបស់ខ្លួនហើយក្រុមហ៊ុនបច្ចេកវិទ្យានេះ ក៏ត្រៀមខ្លួនសម្រាប់វាផងដែរ។ តាមការបញ្ជាក់នៅក្នុងព័ត៌មានថ្មីនេះ ក្រុមហ៊ុន Apple ក៏ធ្វើការផលិតទ្រង់ទ្រាយធំទៅលើស្មាតហ្វូន iPhone 12 series ហើយក្រុមហ៊ុននេះក៏មានគម្រោងក្នុងការលក់នូវស្មាតហ្វូន iPhone 12 នៅចុងខែកញ្ញា ឬដើមខែតុលាខាងមុខនេះ។ ក្រុមហ៊ុន Apple នឹងលក់ស្មាតហ្វូន iPhones 5G ចំនួន 80 លានគ្រឿងនៅចុងឆ្នាំនេះ។ ពាក្យចចាមអារ៉ាមជាច្រើននិយាយថា នៅក្នុងចំណោមស្មាតហ្វូន 80 លានគ្រឿងនេះ 40 % គឺជាស្មាតហ្វូន iPhone 12 Max ៕