ក្រុមហ៊ុន Huawei មានគោលដៅក្នុងការតម្លើងនូវប្រព័ន្ធប្រតិបត្តិការ HarmonyOS Operating System ចំនួន 200 លានគ្រឿង ហើយវាក៏នឹងមានការបង្កើនទៅលើប្រព័ន្ធ Ecosystem របស់ខ្លួន និងការនាំយកនូវ OS នេះ ទៅកាន់ឧបករណ៍ប្រើប្រាស់ជាច្រើនរបស់ពិភពលោកផងដែរ។
លោក Yang Haisong ដែលជាអនុប្រធានផ្នែក Software របស់ក្រុមហ៊ុន Huawei បាននិយាយថា ក្រុមហ៊ុន Huawei មានគម្រោងក្នុងការផលិតស្មាត ហ្វូនចំនួន 100 លានគ្រឿងដែលប្រើប្រាស់នូវប្រព័ន្ធប្រតិបត្តិការ HarmonyOS ក្នុងមួយឆ្នាំ។ ខណៈពេលដែលក្រុមហ៊ុននេះរំពឹងថាឧបករណ៍ 100 លានគ្រឿងទៀតគឺអាចនឹងតម្លើងដោយក្រុមហ៊ុនភាគីទី 3។ កាលពីឆ្នាំមុននេះ ក្រុមហ៊ុន Huawei ក៏បង្ហាញនូវប្រព័ន្ធប្រតិបត្តិការ HarmonyOS AKA Hongmeng OS របស់ខ្លួនផងដែរ។ ប្រព័ន្ធប្រតិបត្តិការ HarmonyOS នេះ ទ្រទ្រង់នូវទូរទស្សន៍ឆ្លាតវៃ ហើយពេលនេះគឺជាការប្រកាសបង្ហាញនូវប្រព័ន្ធប្រតិបត្តិការ HarmonyOS 2.0 ដែលនឹងប្រើប្រាស់នៅលើនាឡិកា រថយន្ត និងផលិតផលឆ្លាតវៃនៅក្នុងផ្ទះជាច្រើនទៀតផងដែរ។
លោក Richard Yu នាយកប្រតិបត្តិរបស់ក្រុមហ៊ុន Huawei បាននិយាយថា ប្រព័ន្ធប្រតិបត្តិការ HarmonyOS នឹងប្រើប្រាស់នៅលើស្មាតហ្វូននៅដើមឆ្នាំក្រោយនេះ។ នៅនៅមិនទាន់ច្បាស់នោះទេថា តើប៉ុន្មានភាគរយនៃស្មាតហ្វូនចំនួន 200 លានគ្រឿងនេះដែលនឹងប្រើប្រាស់នៅលើស្មាតហ្វូននោះ។ ក្រុមហ៊ុន Huawei ក៏ធ្វើការសហការជាមួយនឹងក្រុមហ៊ុនជាច្រើនទៀតផងដែរក្នុងការបង្កើនទៅលើអ្នកប្រើប្រាស់ទៅលើប្រព័ន្ធប្រតិបត្តិការ HarmonyOS នេះ៕
