Counterpoint Research គឺជាក្រុមហ៊ុនវិភាគដ៏ល្បីល្បាញ ទើបតែចេញផ្សាយនូវរបាយការណ៍មួយសម្រាប់ទីផ្សារស្មាតហ្វូននៅក្នុងប្រទេសកូរ៉េខាងត្បូងនៅក្នុងត្រីមាសទី 2 ឆ្នាំ 2020 នេះ។ តាមការបញ្ជាក់របស់ក្រុមហ៊ុននេះ ក្រុមហ៊ុន Samsung នាំមុខទីផ្សារដែលតាមពីក្រោយដោយក្រុមហ៊ុន Apple និង LG ដែលជាប់ចំណាត់ថ្នាក់លេខ 2 និងលេខ 3។
ក្រុមហ៊ុនស្រាវជ្រាវទីផ្សារនេះ នៅមិនទាន់ចេញផ្សាយនូវរបាយការណ៍របស់ខ្លួននៅលើវេបសាយនៅឡើយទេ ប៉ុន្តែក្រុមហ៊ុននេះក៏បញ្ជាក់ថា ក្រុមហ៊ុន Samsung គឺជាប់ចំណាត់ថ្នាក់កំពូលជាមួយនឹងចំណែកទីផ្សារចំនួន 67%។ ក្រុមហ៊ុននេះ គឺមានការពង្រឹងដល់ទៅ 3% បើធៀបទៅនឹងត្រីមាសមុននេះ ក្រុមហ៊ុន Apple ជាប់ចំណាត់ថ្នាក់លេខ 2 ដែលមានចំណែកទីផ្សារចំនួន 19% ។ ក្រុមហ៊ុនបច្ចេកវិទ្យាយក្សនេះ ក៏មានការកើនឡើងចំនួន 1% បើធៀបទៅនឹងត្រីមាសមុននេះផងដែរ។ ក្រុមហ៊ុន LG ជាប់ចំណាត់ថ្នាក់លេខ 3 ដែលមានចំណែកទីផ្សារចំនួន 13% ដែលមានការធ្លាក់ចុះ 3% បើធៀបទៅនឹងត្រីមាសមុននេះ។
ក្រុមហ៊ុន Samsung គឺនាំមុខទីផ្សាររបស់ប្រទេសកូរ៉េខាងត្បូងនេះដោយសារតែការលក់ដ៏ខ្លាំងក្លានៃស្មាតហ្វូនត្រកូល Galaxy A series និងGalaxy S20 series ។ ជាក់ស្តែង ស្មាតហ្វូនចំនួន 5 នៅក្នុងចំណោម 10 ម៉ូឌែលដែលលក់ដាច់បំផុតគឺជាស្មាតហ្វូន Galaxy A series ។ ស្មាតហ្វូន Apple iPhone SE 2020 គឺជាស្មាតហ្វូនដែលលក់ដាច់បំផុតនៅក្នុងត្រីមាសទី 2 ឆ្នាំ 2020 នេះ៕
