ថ្មីៗនេះ អ្នកជំនាញបច្ចេកវិទ្យាជាច្រើននៅក្នុងប្រទេសចិន បានប្រកាសចេញនូវគម្រោងក្នុងការបង្កើតនូវមូលនិធិនៅក្នុងស្រុកនៅចុងឆ្នាំនេះ ដើម្បីជួយដល់ក្រុមហ៊ុននានាដែលរងផលប៉ះពាល់ខ្លំាង។ នេះគឺជាការបោះជំហានមួយថ្មី នៅពេលដែលមានការដាក់ទណ្ឌកម្មជាច្រើនពីសហរដ្ឋអាមេរិកទៅលើក្រុមហ៊ុនជាច្រើនរបស់ចិន ពីសំណាក់រដ្ឋបាលរបស់លោកត្រាំ។
ថ្មីៗនេះក្រុមហ៊ុនបណ្តាក់ទុន China Europe Capital បានប្រមូលថវិកាច្រើនជាង 5 ពាន់លានយ័ន (ប្រហែលជា 731 ដុល្លារអាមេរិក) សម្រាប់មូលនិធិនេះ ដែលនិងចាប់ផ្តើមវិនិយោគទៅលើបច្ចេកវិទ្យាជាច្រើន។ មូលនិធិថ្មីនេះ គឺមានគោលដៅក្នុងការបង្កើតនូវក្រុមហ៊ុនបច្ចេកវិទ្យាជំនាន់បន្ទាប់របស់ក្រុមហ៊ុននេះ។ អ្នកជំនាញបច្ចេកវិទ្យាជាច្រើនរួមមានទាំងអតីតនាយកប្រតិបត្តិជាច្រើនរបស់ក្រុមហ៊ុនធំៗដូចជា Huawei និង SMIC នឹងផ្តោតទៅលើបច្ចេកវិទ្យា 5G networking និងបច្ចេកវិទ្យា AI ។
អ្វីដែលគួរអោយកត់សម្គាល់នោះ មូលនិធិថ្មីនេះ គឺបង្កើតឡើងនៅពេលដែលរដ្ឋាភិបាលធ្វើការវិនិយោគខ្លាំងក្លាទៅលើក្រុមហ៊ុនបច្ចេកវិទ្យាក្នុងស្រុកវិញ។ សង្គ្រាមបច្ចេកវិទ្យារវាងទីក្រុងវ៉ាស៊ីនតោន និងប៉េកាំងក៏ជម្រុញអោយមានការវិនិយោគជាច្រើនផងដែរ។ នៅក្នុងរយៈពេលថ្មីៗនេះ ទំនាក់ទំនងរវាងសហរដ្ឋអាមេរិក និងចិនគឺមានការថមថយដោយសារតែការរីករាលដាលនៃមេរោគរាតត្បាតកូរ៉ូណាវីរុស។ តាមការបញ្ជាក់នៅក្នុងរបាយការណ៍ចេញពី Reuters នោះ ចិន និងសហរដ្ឋអាមេរិកគឺជាប្រទេសមហាអំណាចមានការប្រកួតប្រជែងខ្លាំងក្លាដែលនឹងបញ្ជប់នៅពេលដែលមានភាគីណាម្នាក់ដួលរលំ៕