យោងតាមប្រភពព័ត៌មានច្បាស់ការណ៍មួយបាននិយាយថាក្រុមហ៊ុន Xiaomi បាននឹងកំពុងរៀបចំព្រឹត្តិការណ៍ប្រកាសបង្ហាញចេញនូវស្មាតហ្វូនត្រកូល Mi 10T Series ដែលព្រឹត្តិការណ៍នោះនឹងត្រូវធ្វើឡើងតាមរយះការ Livestream នៅលើអនឡាញនាថ្ងៃទី 30 ចុងខែកញ្ញានេះវេលាម៉ោង 2PM (ម៉ោងក្នុងតំបន់)។
ស្មាតហ្វូនស៊េរីថ្មីដែល Xiaomi ត្រៀមដាក់បង្ហាញចេញនៅថ្ងៃនោះគឺមានដូចជា Mi 10T, Mi 10T Pro និង Mi 10T Lite ហើយម៉ូដែល Lite នេះត្រូវបានគេវាយតម្លៃថានឹងបង្ហាញខ្លួនឡើងមកជាមួយនឹងការបំពាក់នូវបន្ទះឈីប Snapdragon 750G ដែលទើបប្រកាសចេញកាលពីម្សិលមិញនេះ។ បើតាមប្រភពព័ត៌មានចចាមអារ៉ាមបានអោយដឹងថាស្មាតហ្វូន Xiaomi Mi 10T Pro នឹងបំពាក់ដោយអេក្រង់ដែលមានកម្រិត refresh rate 144Hz មានថ្មធំទំហំ 5,000mAh ជាមួយបច្ចេកវិទ្យាសាកភ្លើងល្បឿនលឿនកំលាំង 50W និងបំពាក់កាមេរ៉ាគោលទំហំ 108MP។ ចំនែកឯម៉ូដែល Mi 10T វិញនឹងមានកាមេរ៉ាគោលទំហំ 64MP។
ស្មាតហ្វូនជំនាន់ថ្មីនេះនឹងត្រូវដំឡើងចេញពីប្រអប់ជាមួយ MIUI12 នៅលើប្រតិបត្តិការ Android 11។ ហើយស្មាតហ្វូនទាំងពីរនេះនឹងប្រើប្រាស់បន្ទះឈីប Snapdragon 865 SoC។ សម្រាប់តម្លៃនៃស្មាតហ្វូនជំនាន់ថ្មីទាំងបីស៊េរីនេះត្រូវបានគេព្យាករណ៍ថាម៉ូដែល Mi 10T Lite នឹងមានតម្លៃខ្ទង់ 300 អឺរ៉ូ ខណៈម៉ូដែល Mi 10T នឹងមានតម្លៃខ្ទង់ 499 អឺរ៉ូ និងម៉ូដែល Mi 10T Pro នឹងមានតម្លៃខ្ទង់ 599 អឺរ៉ូ៕