រំលឹកដល់ទិដ្ឋភាពពិសេសមួយនៅក្នុងព្រឹត្តិការណ៍ CES 2019 នេះ គឺជាការបង្ហាញវត្តមានរបស់ទូរទស្សន៍ ដែលអាចរមូរបានរបស់ក្រុមហ៊ុន LG ដែលមានឈ្មោះហៅថា LG Signature OLED TV R។ ទូរទស្សន៍នេះ គឺត្រូវបានគេចាត់ស្ថិតនៅក្នុងបញ្ជី Best of CES 2019 ថែមទៀតផង។ មកដល់ថ្ងៃនេះ គឺមានរយៈពេលជិត 2 ឆ្នាំហើយ ចាប់តាំងពីការបង្ហាញនូវទូរទស្សន៍នេះ ប៉ុន្តែវានៅមិនទាន់ដាក់លក់នៅឡើយទេ។
នៅថ្ងៃនេះយោងតាមប្រភពមួយចេញពីកូរ៉េនិយាយថា ទូរទស្សន៍ថ្មីនេះនឹងមានការផ្លាស់ប្តូរនៅខែក្រោយនេះ។ តាមការបញ្ជាករបស់ Business Korea បានអោយដឹងថា ទូរទស្សន៍ LG Signature OLED TV R នេះ នឹងអាចរកទិញបាននៅដើមខែក្រោយនេះហើយ។ ក្នុងនោះ ក៏មានការរាយការណ៍ផងដែរថា ក្រុមហ៊ុន LG នឹងរៀបចំនូវព្រឹត្តិការណ៍តូចមួយនៅពាក់កណ្តាលខែតុលានេះ ហើយទូរទស្សន៍នេះនឹងដាក់លក់ផងដែរ។ ការបង្ហាញទូរទស្សន៍នេះ គឺមានរយៈពេលជិតមួយឆ្នាំហើយ បន្ទាប់ពីក្រុមហ៊ុន LG បាននិយាយថា ក្រុមហ៊ុននឹហដាក់លក់ទូរទស្សន៍ 65-inch TV នេះជាមួយនឹងតម្លៃ $85,000។
ទូរទស្សន៍ LG Signature OLED TV R នេះ ដំណើរការនូវប្រព័ន្ធប្រតិបត្តិការ webOS ប៉ុន្តែក៏មានការទ្រទ្រង់ទៅលើ Google Assistant ផងដែរ។ ក្រុមហ៊ុន LG បញ្ជាក់ថា វាក៏មានការទ្រទ្រង់ទៅលើ Amazon Alexa និង Apple’s AirPlay 2 ថែមទៀតផង។ សម្រាប់អេក្រង់ដែលបត់បាននេះ គឺមានដំណើរការបានក្នុងរយៈពេល 10 វិនាទីប៉ុណ្ណោះ អេក្រង់នេះ អាចផ្លាស់ប្តូរទៅលើកំពស់ផ្សេងៗតាមចិត្តរបស់អ្នកផងដែរ។ ហើយទូរទស្សន៍នេះ ភ្ជាប់នូវ Speaker 100W។ ៕
