realme ដែលជាក្រុមហ៊ុនម៉ាកយីហោស្មាតហ្វូនវ័យក្មេងរបស់ចិន ដែលកំពុងតែបោះជំហ៊ានខ្លាំងនោះ បានបង្ហាញចេញនូវផលិតផលជាច្រើន ដែលមានទំនាក់ទំនងជាមួយគ្នា ដើម្បីបង្កើតនូវប្រព័ន្ធអេកូឡូស៊ីរបស់ខ្លួន។ នៅក្នុងព្រឹត្តិការណ៍ IFA 2020 នៅក្នុងខែកញ្ញាកន្លងទៅនេះ ក្រុមហ៊ុននេះ ក៏បានបង្ហាញចេញនាឡិកាមួយផងដែរ។ នៅថ្ងៃទី 2 ខែវិច្ឆិការនេះ ក្រុមហ៊ុន realme បានប្រកាសថា ខ្លួនត្រៀមបង្ហាញនូវនាឡិកា realme Watch S នៅក្នុងប្រទេសប៉ាគីស្ថានផងដែរ។
នាឡិកា realme Watch S នេះត្រូវបានប្រទះឃើញនៅលើគេហទំព័រមួយដែលមានការទម្លាយអំពីលក្ខណៈសម្បត្តិជាច្រើនរបស់វា។ នៅក្នុងការទម្លាយមួយ ដែលមានប្រភពចេញពីប្រទេសប៉ាគីស្ថាន គឺមានការបង្ហាញអំពីមុខងារ និងការឌីស្សាញរបស់នាឡិកានេះផងដែរ។ នាឡិកា realme Watch S នឹងមានអេក្រង់មូលទំហំ 1.3 អ៊ីង ដែលអេក្រង់នេះ គឺសង្ស័យថា អាចជាមានអេក្រង់ OLED ។
យោងតាមការបង្ហោះរបស់ក្រុមហ៊ុន realme នៅប៉ាគីស្ថាន បានបញ្ជាក់ថា នាឡិកានេះ មានការទ្រទ្រង់នូវ 16 Sports Modes ហើយវាមានមុខងារក្នុងការថែរក្សាខុសភាពជាច្រើនទៀត។ នាឡិកានេះ ក៏មានការវាស់ទៅលើចង្វាក់បេះដូង និង SpO2 Sensor សម្រាប់វាស់ទៅលើកម្រិតអុកស៊ីសែននៅក្នុងឈាមថែមទៀតផង។ នាឡិកានេះ មានលេខម៉ូឌែល RMA207 ហើយវាមានពណ៌ខ្មៅ ទឹកក្រូច ខៀវ និងបៃតង៕