របាយការណ៍ពីបណ្តាញ Yandex របស់ប្រទេសរុស្ស៊ីបានអោយដឹងថា Xiaomi បានក្លាយជាម៉ាកយីហោស្មាតហ្វូនដ៏មានប្រជាប្រិយភាពបំផុតនៅទីផ្សារប្រទេសរុស្ស៊ីអស់រយះពេល 4 ឆ្នាំមកហើយ។ ថ្មីៗនេះ Yandex បានធ្វើការស្ទង់មតិមួយស្តីពីតម្រូវការប្រើប្រាស់ម៉ាកស្មាតហ្វូនរបស់ប្រជាជនរុស្ស៊ី។ ក្រុមហ៊ុននេះបានធ្វើការស្រង់ទិន្នន័យជាច្រើនរបស់អ្នកប្រើប្រាស់នៅលើប្រព័ន្ធអនឡាញចាប់ពីថ្ងៃទី 1 ខែមករា ឆ្នាំ 2010 ដល់ថ្ងៃទី 18 ខែតុលា ឆ្នាំ 2020។
ទិន្នន័យដែល Yandex ទទួលបានគឺថានៅឆ្នាំ 2010 ម៉ាកយីហោស្មាតហ្វូនដែលមានប្រជាប្រិយភាពខ្លាំងបំផុតសម្រាប់ប្រជាជនរុស្ស៊ីគឺ Nokia ប៉ុន្តែក្រោយមក Nokia ត្រូវបានបាត់បង់ប្រជាប្រិយភាពដោយសារ Samsung និង Apple។ ក្រោយក្នុងឆ្នាំ 2016 ក្រុមហ៊ុន Samsung និង Apple ត្រូវបានធ្លាក់ប្រជាប្រិយភាពវិញម្តងនៅពេលដែល Xiaomi បានបោះជំហានចូលទៅក្នុងទីផ្សារប្រទេសរុស្ស៊ីជាលើកដំបូង។ ក្នុងឆ្នាំ 2016 ក្រុមហ៊ុនចិនមួយនេះបានវ៉ាដាច់ Apple ដោយកាន់បានដំណែងលេខ 1 និងលេខ 2 ជាមួយនឹងការលក់ស្មាតហ្វូនម៉ូដែល Redmi 4 Prime និង Redmi Note 3 Pro។ មួយឆ្នាំក្រោយមក (2017) Xiaomi បានឈរនៅលេខរៀងកំពូលតារាងសម្រាប់ស្មាតហ្វូនដែលមានប្រជាប្រិយភាពបំផុតក្នុងប្រទេសរ៉ុស្ស៊ី និងនៅឆ្នាំ 2018, Xiaomi បានធ្លាក់មកឈរនៅលេខរៀងទី 8 វិញ ក៏ប៉ុន្តែក្នុងឆ្នាំ 2019 ក្រុមហ៊ុននេះបាននាំមុខគេក្នុងការលក់ជាមួយនឹងការចេញលក់ស្មាតហ្វូនស៊េរី Redmi Note 7។
ក្រុមអ្នកជំនាញទីផ្សារបានពន្យល់ថាកត្តាដែលជម្រុញអោយម៉ាកយីហោស្មាតហ្វូនក្រុមហ៊ុនចិនមួយនេះទទួលបានប្រជាប្រិយភាពខ្លាំងពីប្រជាជនរុស្ស៊ីគឺព្រោះតែការផលិតមានគុណភាពល្អសម្រាប់ការប្រើប្រាស់ និងតម្លៃសមរម្យអាចទទួលយកបាន។ ទិន្នន័យរបស់ Yandex បានបង្ហាញទៀតក្នុងឆ្នាំនេះប្រជាជនរុស្ស៊ីប្រមាណជា 28% បានពិចារណាក្នុងការទិញស្មាតហ្វូន Xiaomi យកទៅប្រើប្រាស់ និងមាន 22% បានសម្រេចទិញស្មាតហ្វូន Samsung ខណៈ 19% សម្រេចចិត្តទិញ iPhone របស់ Apple។ នាពេលបច្ចុប្បន្ន Xiaomi និង Huawei បានស្ថិតក្នុងបញ្ជីក្រុមហ៊ុនដែលមានប្រជាប្រិយភាពទាំង 20 (Top 20) ក្នុងប្រទេសរុស្ស៊ី។
កាលពីឆ្នាំ 2018 ដែលជាឆ្នាំដំបូងរបស់ Xiaomi ដែលជាប់ក្នុងបញ្ជី Top 20 ដោយឈរនៅលេខរៀងទី 11 ហើយក្នុងឆ្នាំ 2020 នេះគឺបានឡើងមកឈរនៅលេខរៀងទី 7 ខណៈដែរ Huawei បានជាប់ក្នុងបញ្ជី Top 20 ជាលើកដំបូងដែលឈរនៅលេខរៀងទី 13។ Xiaomi បានឈរនៅលេខរៀងខ្ពស់ជាងក្រុមហ៊ុន Coca-Cola, LG, Zara, Puma, និង H&M ចំនែកឯ Huawei បានឈរនៅលេខរៀងខ្ពស់ជាងក្រុមហ៊ុន Ostin, McDonald’s, BMW, Pepsi, Asus, Reebok and Levi’s, Samsung, Adidas, Nike និង Apple។ គួរកត់សម្គាល់ផងដែរថា: ការស្ទង់មតិ“ម៉ាកយីហោពេញនិយមបំផុតរបស់រុស្ស៊ី” ត្រូវបានធ្វើឡើងជារៀងរាល់ឆ្នាំគឺចាប់តាំងពីឆ្នាំ 2018 មកម្ល៉េះ៕
