ក្រុមហ៊ុនចិន TCL បានចាប់ផ្តើមនិយាយអំពីស្មាតហ្វូនដែលមានអេក្រង់អាចរមួល “Rollable Display” បានកាលពីដើមឆ្នាំ ពោលគឺនៅក្នុងព្រឹត្តិការណ៍ CES 2020។ ហើយឥឡូវនេះ វីដេអូមួយបានលេចឡើងនៅលើបណ្តាញអ៊ីនធ័រណិតដែលបានបង្ហាញពីគំរូនៃស្មាតហ្វូនមួយនេះ។ នៅក្នុងវីដេអូខ្លី ដែលបានបែកធ្លាយមកនេះបានបង្ហាញពីរបៀបដែលស្មាតហ្វូនដែលមានអេក្រង់ទំហំ 4.5 អ៊ីញអាចលាតសន្ធឹងដល់ទំហំ 6.7 អ៊ីញដោយមិនមានបង្កើនកម្រាស់របស់វានោះឡើយ។
ក្រុមហ៊ុន TCL ត្រូវបានគេដឹងថា បាននឹងកំពុងតែធ្វើការអភិវឌ្ឍន៍បច្ចេកវិទ្យាអេក្រង់ស្មាតហ្វូនដែលអាចរមួលបាន (Rollable Display) ដោយប្រើប្រាស់នូវអេក្រង់ OLED។ ក្រុមហ៊ុនបច្ចេកវិទ្យារបស់ចិនមួយនេះបាននិយាយថា “ជាមួយបច្ចេកវិទ្យាអេក្រង់ Rollable OLED Display គឺវាមានភាពធន់ទៅនឹងការលូតចេញ និងពង្រីកទំហំរបស់វាបានរហូតដល់ទៅ 200 ពាន់ដង” ។ នៅក្នុងសន្និសិទ្ធិ IFA ក្រុមហ៊ុន TCL បាននិយាយថា ខ្លួនមិនមានគម្រោងក្នុងការនាំយកស្មាតហ្វូនដែលមានអេក្រង់អាចរមួលបានចូលទៅក្នុងទីផ្សារនោះទេ រហូតដល់ដំណាច់ឆ្នាំ 2020 នេះ។
ទោះយ៉ាងណាលោក Ross Young ដែលជាស្ថាបនិក និងជាអ្នកវិភាគជាន់ខ្ពស់មួយរូបរបស់ក្រុមហ៊ុន DisplaySearch និង DSCC បានអត្ថាធិប្បាយលើវីដេអូនេះ ដោយលោកបានកត់សម្គាល់ថា វានឹងមានការប្រកួតប្រជែងទីផ្សារខ្លាំងនៅពេលដែលមានការបញ្ចេញស្មាតហ្វូនប្រភេទនេះ គឺដែលមានន័យថាយើងនឹងមិនត្រូវរង់ចាំយូរនោះទេប្រសិនបើយើងមានលទ្ធិភាពអាចផលិតចេញបានហើយនោះ។
ជារួមមកវិញយើងរងចាំមើលទាំងអស់គ្នាថាតើស្មាតហ្វូនអេក្រង់រមួល Rollable Display ដំបូងគេក្នុងលោកពិតជាត្រូវបានបង្ហាញចេញដោយក្រុមហ៊ុន TCL ពិតមែនឬអត់ ស្របពេលដែលក្រុមហ៊ុន LG Display ត្រូវបានគេដឹងថាកំពុងសង្ងំអភិវឌ្ឍន៍ស្មាតហ្វូនប្រភេទនេះផងដែរ ក្រោយពីក្រុមហ៊ុនទទួលបានជោគជ័យទៅលើការផលិតចេញស្មាតធីវីដែលមានអេក្រង់រមួលបានរួចហើយនោះ៕
