ក្រុមហ៊ុន JF Technology ដែលជាបុត្រសម្ព័ន្ធរបស់ក្រុមហ៊ុន JF International បានធ្វើការបោះជំហាននៅក្នុងការសហការក្នុងការបណ្តាក់ទុនជាមួយនឹងក្រុមហ៊ុន Huawei Investment & Holdings Co Ltd ដែលជាក្រុមហ៊ុនមហាយក្សចិន ដើម្បីរួមគ្នាធ្វើការរកស៊ីប្រព័ន្ធ 5G និង 6G ក៏ដូចជាការសិក្សាទៅលើឧស្សាហកម្ម នៃការផលិតបន្ទះឈីបនៅទឹកដីចិន។ យោងតាមការបញ្ជាក់នៅក្នុងរបាយការណ៍របស់ TheStar បានអោយដឹងថា ឯកសារថ្មី ដែលបានដាក់ទៅកាន់ Bursa Malaysia ត្រូវបានក្រុមហ៊ុន JF Tech បញ្ជាក់បន្ថែមថា ក្រុមហ៊ុន Hubble Technology Investment នឹងធ្វើការដាក់បញ្ចូលនូវទឹកប្រាក់ចំនួន 4.5 លានដុល្លារអាមេរិក បន្ថែមទៀតនៅក្នុងក្រុមហ៊ុន JFH Technology ផងដែរ។
នៅក្នុងការចូលរួមវិភាគទាននេះ ទឹកប្រាក់ចំនួន 410,000 ម៉ឺនដុល្លារអាមេរិកនេះ នឹងធ្វើការបង្កើនទៅលើការចុះបញ្ជីរបស់ក្រុមហ៊ុន JFH ខណៈពេលដែលទឹកប្រាក់ចំនួន 1.09 លានដុល្លារអាមេរិក នឹងត្រូវទុកជាទុនបំរុង។ បន្ថែមពីនេះទៀតនោះ ក្រុមហ៊ុន JF International នឹងមានចំនួន 55% ទៅលើភាគហ៊ុនបណ្តាក់ទុននៃប្រាក់ចំនួន 500,000 ដុល្លារអាមេរិករបស់ខ្លួន ខណៈពេលដែលក្រុមហ៊ុន HTI នឹងគ្រប់គ្រងចំនួន 45% ផងដែរ។
ក្រុមហ៊ុន JF Technology បាននិយាយថា កិច្ចសហការនេះ នឹងអនុញ្ញាតអោយក្រុមនេះ ធ្វើការសហការជាមួយនឹងក្រុមហ៊ុន Hubble Technology Investment និងអតិថិជនជាច្រើនទៀត ដូចទៅនឹងក្រុមហ៊ុន Huawei នៅក្នុងប្រទេសចិន អញ្ចឹងដែរ ហើយក្រុមហ៊ុននេះ និងធ្វើការជាមួយគ្នាទៅលើការសិក្សាស្រាវជ្រាវប្រព័ន្ធ 5G និង 6G ក៏ដូចជាការសិក្សាទៅលើឧស្សាហកម្ម នៃការផលិតបន្ទះឈីបដើម្បីច្របាច់បញ្ចូលគ្នារវាងជំនួញក្រុមហ៊ុនទាំងពីរផងដែរ ៕
