កាលពីម្សិលមិញនេះ ប្រទេសអ៊ីតាលី ដែលគេដឹងថា គឺជាប្រទេសធំមួយនៅក្នុបតំបន់អឺរ៉ុប ដែលមានសេដ្ឋកិច្ចរីកចំរើនខ្លាំងនោះ បានធ្វើការរារាំងទៅលើក្រុមហ៊ុនទូរគមនាគមន៍ Fastweb ទៅលើការចុះហត្ថលេខាជាមួយនឹងក្រុមហ៊ុនបច្ចេកវិទ្យា Huawei ក្នុងការផ្គត់ផ្គង់ទៅលើឧបករណ៍សម្រាប់បណ្តាញ 5G network ដែលនេះ គឺជាសញ្ញាណមួយ ដែលមានការបង្ហាញយ៉ាងច្បាស់ថា ទីក្រុងរ៉ូមគឺប្រឆាំងទៅនឹងក្រុមហ៊ុនបច្ចេកវិទ្យាជាច្រើនរបស់ចិនមួយនេះដែរបន្ទាប់ពីបណ្តាប្រទេសមួយចំនួននៅក្នុងតំបន់នេះ។
នៅក្នុងការរារាំងទៅលើកិច្ចព្រមព្រៀងនេះ គឺត្រូវបានសម្រេចចិត្តនៅក្នុងកិច្ចប្រជុំមួយកាលពីដើមខែនេះ ហើយនេះ គឺជាលើកដំបូងបំផុត ដែលប្រទេសអ៊ីតាលី ធ្វើវេតូទៅលើកិច្ចព្រមព្រៀងទៅលើ 5G core networks ជាមួយនឹងក្រុមហ៊ុនបច្ចេកវិទ្យា Huawei។ សូមជំរាបថា នៅក្នុងខែកញ្ញាកន្លងទៅនេះ លោក Mike Pompeo ដែលជារដ្ឋមន្ត្រីការបរទេសសហរដ្ឋអាមេរិក បានធ្វើទស្សនកិច្ចទៅកាន់ប្រទេស អ៊ីតាលី ហើយគាត់និយាយថា ក្រុមហ៊ុនបច្ចេកវិទ្យាយក្សរបស់ចិននេះ គឺបានធ្វើការគំរាមកំហែងទៅលើសុវត្ថិភាពជាតិរបស់ខ្លួនផងដែរតាមរយៈឧបករណ៍បច្ចេកវិទ្យារបស់ក្រុមហ៊ុននេះ។
នៅក្នុងខណៈពេលនេះ ក្រុមហ៊ុន Huawei បានធ្វើការច្រានចោលទាំងស្រុងទៅលើការចោទប្រកាន់ជាច្រើន ដែលបានធ្វើការរារាំងនេះ ហើយអង្គភាពរបស់ខ្លួនប្រចាំនៅក្នុងប្រទេសអ៊ីតាលីនេះ គឺបានត្រៀមខ្លួនរួចជាស្រេច នៅក្នុងការបញ្ជាក់ថា ខ្លួនមានសុវត្ថិភាពទៅលើបច្ចេកវិទ្យាជាច្រើនរបស់ខ្លួន។ គួរបញ្ជាក់់ថា កិច្ចប្រជុំកាលពីដើមខែនេះ គឺមានការតានតឹងយ៉ាងខ្លាំង មុននឹងមានការសម្រេចចិត្តក្នុងការរារាំងទៅលើក្រុមហ៊ុន Fastweb ក្នុងការចុះកិច្ចព្រមព្រៀងជាមួយនឹងក្រុមហ៊ុនបច្ចេកវិទ្យាយក្សរបស់ចិននេះ ក្នុងការផ្គត់ផ្គង់ទៅលើដំណោះស្រាយនៃបច្ចេកវិទ្យា 5G mobile networking នៅក្នុងប្រទេសនៅតំបន់អឺរ៉ុបមួយនេះ។