យោងតាមព័ត៌មានថ្មីមួយ បានបញ្ជាក់ថា ក្រុមហ៊ុន Samsung Electro-Mechanics មានគម្រោងនឹងធ្វើការបង្កើនទៅលើចំនួននៃកាមេរ៉ាសម្រាប់ស្មាតហ្វូនលំដាប់ថវិកាជាច្រើនរបស់ខ្លួនអោយបានកាន់តែច្រើនជាងឆ្នាំមុនៗ។ ឧបករណ៍ថ្មីៗរបស់ Samsung នឹងបង្ហាញខ្លួននៅក្នុងឆ្នាំ 2021 នេះហើយ វានឹងមានចំនួនច្រើនជាង 10% នៃការលក់នៅឆ្នាំក្រោយនេះ។ តាមការបញ្ជាក់នៅក្នុងរបាយការណ៍របស់ TheElec បានអោយដឹងថា នេះគឺជាការបញ្ជាក់ជាលើកដំបូងបំផុត ដែលក្រុមហ៊ុននេះ នឹងធ្វើការផ្គត់ផ្គង់ទៅលើកាមេរ៉ាសម្រាប់ស្មាតហ្វូនលំដាប់ថវិកា Galaxy របស់ក្រុមហ៊ុន Samsung Electronics ជាច្រើនម៉ូឌែលនៅក្នុងឆ្នាំ 2021 ខាងមុខនេះ។
បន្ថែមពីនេះទៀតនោះ ប្រភពខាងលើបានបន្តថា តម្រូវការសម្រាប់ស្មាតហ្វូនដែលមានតម្លៃសមរម្យនេះ នឹងមានការបំពាក់នូវកាមេរ៉ាដ៏ខ្លាំងក្លាថែមទៀតដូចជា optical zoom lens ជាដើម។ នៅក្នុងពេលនេះ ក្រុមហ៊ុននេះ ក៏បានចាប់ផ្តើមធ្វើការផ្គត់ផ្គង់នូវ 3x optical zoom lenses ជាមួយនឹង optical image stabilization (OIS) នៅក្នុងត្រីមាសទី 3 ឆ្នាំ 2020 នេះ ប៉ុន្តែការផលិតនេះនឹងមានការកើនឡើងបន្ថែមទៀត ហើយនឹងប្រើប្រាស់នៅលើស្មាតហ្វូនថ្នាក់កណ្តាលជាច្រើននៅក្នុងពេលដ៏ខ្លីខាងមុខនេះ។
ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ ក៏មានគម្រោងក្នុងការផ្គត់ផ្គង់ទៅលើកាមេរ៉ាសម្រាប់ស្មាតហ្វូន Galaxy A52 និង Galaxy A72 ផងដែរ។ ក្រុមហ៊ុន Samsung Electro-Mechanics ក៏ធ្វើការផ្គត់ផ្គង់ទៅលើកាមេរ៉ា 3x optical zoom នៅលើស្មាតហ្វូន Galaxy S20 FE នេះផងដែរ៕