ក្រុមហ៊ុន Xiaomi បានបញ្ចេញទូរស័ព្ទឆ្លាតអេក្រង់បត់ជំនាន់ដំបូងរបស់ខ្លួន Mi Mix Fold កាលពីអំឡុងខែមិនា ឆ្នាំ 2021 ហើយសម្រាប់ជំនាន់បន្ទាប់ដែលត្រូវបានគេដឹងថាជា Xiaomi Mix Fold 2 នឹងមកដល់ផ្លូវការណ៍ក្នុងខែមិនា ឆ្នាំ 2022 នេះដែរ។ ស្របពេលជាមួយគ្នានេះ Mix Fold 2 ក៏ត្រូវបានបណ្តាញសារព័ត៌មាន និងរបាយការណ៍ជាច្រើនបានធ្វើការចុះផ្សាយទាក់ទងនឹងគុណសម្បត្តិជាច្រើនដែលនឹងមានមកជាមួយទូរស័ព្ទឆ្លាតអេក្រង់បត់ជំនាន់ទីពីររបស់ក្រុមហ៊ុនបច្ចេកវិទ្យាដ៏មានឥទ្ធិពលប្រទេសចិនមួយនេះផងដែរ។
យើងដឹងហើយថាកាលពីជំនាន់ដំបូង Xiaomi Mi Mix Fold ត្រូវបានក្រុមហ៊ុនបំពាក់នូវបន្ទះអេក្រង់ក្រៅក្នុងដែលផលិតដោយក្រុមហ៊ុនចិនឈ្មោះថា BOE ប៉ុន្តែ សម្រាប់ Mix Fold 2 ត្រូវបានគេដឹងថា Xiaomi អាចនឹងងាកមកប្រើបន្ទះអេក្រង់របស់ក្រុមហ៊ុន Samsung វិញ។ ជាមួយគ្នានេះ បើតាមការបញ្ជាក់ដោយគណនី Weibo Digital Chat Station ថ្មីៗនេះ បានឲ្យដឹងថា Xiaomi Mix Fold 2 នឹងបំពាក់អេក្រង់ដែលមានគុណភាពខ្ពស់ជាមួយកម្រិតល្បឿន refresh rate ខ្ពស់ជាងជំនាន់មុនផងដែរ។
ប្រភពពីគណនីដដែលខាងលើនេះបានឲ្យដឹងថា Xiaomi Mix Fold 2 នឹងបំពាក់បន្ទះអេក្រង់បត់ខាងក្នុងប្រភេទ UTG LTPO-AMOLED ដែលមានល្បឿន refresh rate 120Hz របស់ Samsung ធៀបនឹងជំនាន់មុនដែលមាន OLED 90Hz។ រីឯអេក្រង់ខាងក្រៅនឹងមានទំហំប្រហាក់ប្រហែលគ្នានឹងអេក្រង់ខាងក្រៅរបស់ Honor Magic V ដែលទើបនឹងប្រកាសចេញថ្មីៗនេះដែលមានខ្នាតទ្រវែង 21:9 aspect ratio។ ជាងនេះទៅទៀត អេក្រង់ខាងក្នុងរបស់ Mix Fold 2 ក៏នឹងគាំទ្រកម្រិតបង្ហាញចេញដល់ 2K ថែមទៀតផង។
ក្រៅពីនេះ Xiaomi Mix Fold 2 នឹងបំពាក់នូវបន្ទះឈីប Snapdragon 8 Gen 1 រួមនឹងអេក្រង់បត់ខាងក្នុងទំហំ 8.1 អ៊ីញ Ultra-Thin Glass ដែលប្រើនូវបច្ចេកវិទ្យាបង្ហាញ LTPO-AMOLED Display។ កំពូលស្មាតហ្វូនបត់អេក្រង់ជំនាន់ថ្មីជំនាន់ទី 2 របស់ក្រុមហ៊ុនបច្ចេកវិទ្យាខ្នាតយក្សលំដាប់ថ្នាក់ពិភពលោកក្នុងប្រទេសចិនមួយនេះ អាចនឹងមកដល់ផ្លូវការណ៍នៅត្រីមាសទី 1 ក្នុងឆ្នាំ 2022 នេះ (អាចក្នុងខែមិនា ដូចជំនាន់ទីមួយដែរ)៕