ក្រុមហ៊ុនផលិតរថយន្ត Geely របស់ចិននឹងចូលប្រឡូកក្នុងវិស័យស្មាតហ្វូនដោយបាននឹងកំពុងចចារទិញយកក្រុមហ៊ុនផលិតស្មាតហ្វូន Meizu

Geely គឺជាក្រុមហ៊ុនផលិតរថយន្តរបស់ប្រទេសចិនដែលគ្រប់គ្រងលើម៉ាករថយន្តល្បីៗរបស់ចិនដូចជា Lotus, Volvo និង Polestar ជាដើម ហើយក្នុងពេលនេះក្រុមហ៊ុនមួយនេះត្រូវបានគេដឹងថា ត្រៀមខ្លួនចូលប្រឡូកក្នុងទីផ្សារស្មាតហ្វូនបន្ថែមទៀត។

យោងតាមរបាយការណ៍ចេញពីគេហទំព័រចិន 36Krypton បានផ្សាយថា ក្រុមហ៊ុនផលិតរថយន្តនេះគ្រោងនឹងទិញ Meizu ដែលជាក្រុមហ៊ុនផលិតស្មាតហ្វូនមានអាយុកាលជិត 20 ឆ្នាំមកហើយ។ ក្នុងរបាយការណ៍បានបញ្ជាក់ឲ្យដឹង ក្រុមហ៊ុន Geely អាចនឹងប្រកាសចេញស្មាតហ្វូនដំបូងរបស់ខ្លួននៅក្នុងឆ្នាំ 2023។ Geely បានសម្លឹងក្នុងការចូលប្រឡូកក្នុងអាជីវកម្មស្មាតហ្វូនអស់រយះពេលជាយូរណាស់មកហើយ ដោយបានបង្កើតស្ថាប័នផ្ទាល់ខ្លួនមួយដោយមានឈ្មោះថា Xingji Times ព្រមទាំងបានគៀគរនាយកប្រតិបត្តិក្រុមហ៊ុនធំៗដូចជា ZTE,  Xiaomi និង OPPO ដើម្បីជួយក្នុងការវែកផ្លូវសម្រាប់ដំណើរការអាជីវកម្មស្មាតហ្វូនរបស់ខ្លួន។

បើតាមប្រភពបាននិយាយថា Geely បានចំនាយទុនវិនិយោគសម្រាប់អាជីវកម្មថ្មីរបស់ខ្លួនប្រមាណ 1,5 ពាន់លានដុល្លាររួចហើយ ដែលមិនទាន់គិតបញ្ចូលក្នុងគម្រោងទិញយកក្រុមហ៊ុន Meizu នោះទេ។ ទោះជាយ៉ាងណាក៏ដោយ អ្នកនាំពាក្យក្រុមហ៊ុនទាំងពីរបានបដិសេធមិនធ្វើអត្ថាធិប្បាយជុំវិញបញ្ហានេះទេ។ គេហទំព័រ 36Krypton បានបន្ថែមថា លោក Li Shufu អគ្គនាយកក្រុមហ៊ុន Geely Holding Group បាននិយាយថា អាជីកម្មស្មាតហ្វូន និងការច្នៃប្រឌិតលើផ្នែក Software សម្រាប់រថយន្ត គឺនឹងផ្តល់នូវបទពិសោធន៍បច្ចេកវិទ្យាថ្មីកាន់តែអស្ចារ្យសម្រាប់អ្នកប្រើ។

បច្ចុប្បន្នក្រុមហ៊ុន Geely កំពុងធ្វើសំឡឹងរកដៃគូសហការដើម្បីផលិតស្មាតហ្វូនឲ្យខ្លួន ហើយក្នុងនោះក្រុមហ៊ុន Foxconn ដែលផលិត iPhone  ឲ្យ Apple អាចជាជម្រើសរបស់ Geely។ បច្ចុប្បន្ន Meizu បាននាំចេញស្មាតហ្វូនបានចំនួនក្រោម 1 លានគ្រឿងប៉ុណ្ណោះក្នុងរយះពេលមួយឆ្នាំ ដែលធ្លាក់ចុះពី 20 លានគ្រឿងកាលពីប៉ុន្មានឆ្នាំមុន។ Meizu បានបញ្ចេញស្មាតហ្វូនចុងក្រោយរបស់ខ្លួនម៉ូដែល Meizu 18 កាលពីអំឡុងខែមិនា ឆ្នាំ 2021 និង Meizu 18s និង 18s Pro នៅអំឡុងខែកញ្ញា ឆ្នាំ2021 ប៉ុន្តែ មិនទទួលបានជោគជ័យក្នុងទីផ្សារនោះទេ៕