បងប្អូនកំពូល Tablet ជំនាន់ថ្មី Samsung Galaxy Tab S8 អាចនឹងបង្ហាញវត្តមាននៅលើទីផ្សារតំបន់អឺរ៉ុបឆាប់ៗខាងមុខនេះ។ ដោយឡែកនៅថ្ងៃនៅដែលនៅលើបញ្ចីរបស់ក្រុមហ៊ុន Amazon ក្នុងប្រទេសអ៊ីតាលីក៏បានធ្វើការចុះបញ្ចីរបស់កំពូល Tablet ជំនាន់ថ្មីនេះផងដែរ ប៉ុន្តែ មិនបានបញ្ជាក់ពីតម្លៃនោះទេ។
បើតាមប្រភពបានបញ្ជាក់ផ្លូវការណ៍ថា បងប្អូនកំពូល Tablet Galaxy Tab S8 ទាំងបីស៊េរី គឺបំពាក់នូវបន្ទះឈីប Snapdragon 8 Gen 1 និងដំឡើងដោយប្រតិបត្តិការ Android 12 ជាមួយ One UI4.0 ចេញពីប្រអប់តែម្តង។ សម្រាប់អេក្រង់វិញ នៅលើម៉ូដេលប្អូន Tab S8 គឺមានទំហំ 11 អ៊ីញ, បង Tab S8+ មានអេក្រង់ទំហំ 12.4 អ៊ីញ និងបងធំ Tab S8 Ultra មានអេក្រង់ទំហំ 14.6 អ៊ីញ ហើយអេក្រង់របស់ Ultra ក៏មានរំលេចដោយឆកសម្រាប់ដាក់សែនស័រផ្សេងៗរួមនឹងសែនស័រកាមេរ៉ាទំហំ 12MP ចំនួនពីរគ្រាប់ផងដែរ។ សម្រាប់ថ្មវិញ Tab S8 នឹងមានទំហំ 8,000mAh, Tab S8+ នឹងមានទំហំ 10,900mAh និងបងធំ Ultra នឹងមានទំហំដល់ទៅ 11,200mAh ជាមួយបច្ចេកវិទ្យាភ្លើងល្បឿនលឿនកំលាំងដល់ 45W។
បើតាមការបង្ហាញនៅលើបញ្ចី Amazon បង្ហាញថា Galaxy Tab S8 និង S8+ មានជម្រើសពណ៌ទឹកប្រាក់, ផ្កាឈូក និងប្រផេះ ខណៈបងធំគឺមានជម្រើសតែមួយពណ៌ប៉ុណ្ណោះ គឺប្រផេះ ហើយគ្រប់ម៉ូដែលទាំងអស់គឺមានជម្រើសប្រើ Wi-Fi និងស៊ីមសេវា 5G ព្រមទាំងមានមកជាមួយប៊ិច S-Pen ទាំងអស់ រួមនឹងកាមេរ៉ាក្រោយទំហំ 13MP ដូចៗគ្នា។
សម្រាប់ព័ត៌មានចុងក្រោយបានបញ្ជាក់ច្បាស់ថា Samsung នឹងប្រារព្ធព្រឹត្តិការណ៍ដាក់សម្ភោធកំពូល Tablet S8 រួមជាមួយកំពូលស្មាតហ្វូន Galaxy S22 Series នៅថ្ងៃទី 09 ខែកុម្ភៈ ឆ្នាំ 2022 ខាងមុខនេះ៕