យោងតាមការទម្លាយព័ត៌មានថ្មីមួយនៅថ្ងៃនេះ គឺបានលើកឡើងថា ក្រុមហ៊ុន Apple នឹងបំបែកនូវកំនត់ត្រាថ្មីទៅលើប្រាក់ចំនេញរបស់ខ្លួននៅក្នុងត្រីមាសចុងក្រោយក្នុងឆ្នាំ 2021 កន្លងទៅនេះ ដោយសារតែការពង្រឹងទៅលើការផលិត iPhone និងសេវាកម្មជាច្រើនរបស់ក្រុមហ៊ុន Apple មានសន្ទុះខ្លាំងក្រោយវត្តមានរបស់ iPhone 13 Series។
ជាមួយនឹងការព្យាករណ៍នេះ ក៏មានព័ត៌មានចេញពីអ្នកទម្លាយ Katy Huberty របស់ក្រុមហ៊ុន Morgan Stanley ផងដែរ ដោយលោកបាននិយាយថា ប្រាក់ចំនេញសរុបរបស់ក្រុមហ៊ុន Apple គឹមានចំនួន 122.3 ពាន់លានដុល្លារអាមេរិកសម្រាប់ត្រីមាសទី 4 ឆ្នាំ 2021 នេះដែលមានកំណើន 41.9% ហើយសម្រាប់កំនើនតម្លៃមួយហ៊ុននោះគឺ earnings-per-share (EPS) $1.97។ សម្រាប់ការព្យាករណ៍នេះគឺមាន 3%។
លោក Huberty បានបង្ហាញនូវការជឿជាក់ថា ចំនួននៃការលក់ស្មាតហ្វូន iPhone គឺបានប្រហែលជាចំនួន 83 លានគ្រឿងនៅគិតត្រឹមខែធ្នូកន្លងទៅនេះ។ សម្រាប់ការនាំចេញទៅលើ iPad គឺមានចំនួន 14.9 លានគ្រឿងដែលមានការធ្លាក់ចុះពី 17 លានគ្រឿង។ អ្នកវិភាគនេះ បានបន្តថា ក្រុមហ៊ុន Apple នឹងមានប្រាក់ចំនេញដល់ទៅ 19.2 ពាន់លានដុល្លារអាមេរិកដែលមានកំនើនធៀបទៅនឹងឆ្នាំមុននេះគឺ 21.7%។ លោកបានសង្កត់ធ្ងន់ថា សម្រាប់ត្រីមាសទី 1 ឆ្នាំ 2022 នេះ ចំនួននៃ iPhone ដែលលក់សរុបគឺ 55 លានគ្រឿង៕